Կառավարութիւնը Խստիւ Դատապարտեց Դամասկոսի Մէջ Լիբանանեան Փոխադրատարին Պայթումը Եւ Յորդանանցի Օդաչուին Եւ Ճափոնցիներուն Մահապատիժները

0
141

Լիբանանի Կառավարութիւնը երէկ կէսօրէ առաջ ժամը 11:00-ին, վարչապետարանին մէջ գումարեց իր ընթացիկ նիստը` նախագահութեամբ վարչապետ Թամմամ Սալամի:

Նիստէն ետք տեղեկատուութեան նախարար Ռամզի Ժրէյժ յայտնեց, որ կառավարութիւնը իր նիստին ընթացքին խստիւ դատապարտեց լիբանանցի ուխտաւորներու փոխադրատարը Դամասկոսի մէջ ահաբեկչութեան թիրախ դարձնելու արարքը, ինչպէս նաեւ դատապարտեց ՏԱԱԵՇ-ի կողմէ յորդանանցի օդաչու Մաազ Քասասիպայի եւ ճափոնցի քաղաքացիներուն դէմ գործուած մահապատիժները:

Ժրէյժ նշեց, որ վարչապետ Սալամ նիստին ընթացքին շեշտեց, որ Լիբանան կը պայքարի ահաբեկչութեան դէմ` նշելով, որ այդ իմաստով կառավարութիւնը լիբանանեան բանակին եւ ապահովութեան ուժերուն տրամադրած է քաղաքական իր հովանաւորութիւնը:

Ժրէյժ յայտնեց, որ կառավարութիւնը տուաւ շարք մը որոշումներ, որոնց շրջագիծին մէջ Լիբանան Միջազգային դրամատունէն 6 միլիոն 400 հազար տոլարի վարկ մը պիտի խնդրէ, որպէսզի հաղորդակցութեան միջոցներու նախարարութիւնը յաջողեցնէ որոշ կենսոլորտային ծրագիրներ, որոնք կը նպատակադրեն բջիջային հեռաձայններուն համացանցի ծառայութեան բարելաւումը:

Կառավարութիւնը համաձայն գտնուեցաւ նաեւ Թուրքիոյ հետ զինուորական վարժութիւններ կատարելու փոխըմբռնումի ծրագիրի մը, ինչպէս նաեւ Ժապալ Մըհսենը թիրախ դարձուցած զոյգ պայթումներուն թղթածրարը փոխանցեց Արդարութեան գերագոյն խորհուրդին:

LEAVE A REPLY

Please enter your comment!
Please enter your name here