Ցեղասպանութենէն Վերապրած Արշալոյս Մարտիկանեանի Յուշերուն Հիման Վրայ Ժապաւէն Կը Պատրաստուի

0
160

ԵՐԵՒԱՆ, «Երկիր Մեդիա».- Հայոց Ցեղասպանութեան արհաւիրքը ապրած Արշալոյս Մարտիկանեանի (Օրօրա) յուշերուն վրայ հիմնուած եւ 1918ին Հոլիվուտի մէջ նկարահանուած Հայոց Ցեղասպանութեան մասին պատմող առաջին շարժապատկերին վերաբերող վաւերագրական ժապաւէն մը կը պատրաստուի Հայաստանի մէջ: Նոր շարժապատկերին հեղինակն ու արտադրողը Հայոց Ցեղասպանութեան թանգարան–հիմնարկն է: Շարժապատ-կերը պատրաստ պիտի ըլլայ մինչեւ տարեվերջ:
Արշալոյսը Մարտիկեաններու բազմադամ ընտանիքի երրորդ զաւակն էր: Անհոգ մանկութիւն, անխռով ընտանեկան կեանք, ջութակահար դառնալու մանկական երազանք:
Գործադրուեցաւ հայերու բնաջնջման հրէշային ծրագիրը: 1915 թուական, Յունիս. Արշալոյս 14 տարեկան էր: Բռնագաղթ, կոտորածներ, բռնի թրքացում: Արշալոյսն ու մանկահասակ այլ աղջիկներ առեւանգուեցան գաղթի ճամբուն վրայ: Արշալոյս կրցաւ փախուստ տալ հարեմէն: Երկու տարուան ընթացքին ան կտրեց շուրջ 600 քմ., 85 սենթով վաճառուեցաւ Մալաթիոյ, Ուրֆայի եւ Մուշի ստրկավաճառներու շուկաներուն մէջ, անցաւ սարսափներով լի երկար ճամբայ մը եւ ան յայտնուեցաւ Միացեալ Նահանգներու մէջ, ուր հրատարակուեցաւ անոր յուշագրութիւնը՝ «Յօշոտուած Հայաստան», որուն հիման վրայ ալ պատրաստուեցաւ Հայոց Ցեղապսանութեան մասին պատմող առաջին գեղարուեստական ժապաւէնը, որուն գլխաւոր դերը կատարեց ինք՝ Արշալոյս Մարտիկանեանը (Օրօրա): Ժապաւէնը բացառիկ յաջողութիւն արձանագրեց. 30 միլիոն տոլարի հասոյթ, որ տրամադրուեցաւ Մերձաւոր Արեւելքի 60 հազար հայ որբերու կենսապահովման:
Օրօրան դարձաւ հանրաճանաչ, սակայն ան աստղ դառնալու պատրաստ չէր: Արշալոյս-Օրօրայի պատմութիւնն ու ժապաւէնը մնացին լուսարձակներէ հեռու, մոռցուեցան, մոռցուեցաւ նաեւ Օրօրան։ Ան մահացաւ մենութեան մէջ՝ մերժուած բոլորին կողմէ:
Բայց ան պիտի յայտնուի նոր առաքելութեամբ ու նոր պատգամով:

LEAVE A REPLY

Please enter your comment!
Please enter your name here