Վարդան Օսկանեան Հանդէս Եկած Է Յայտարարութեամբ

0
139

«Բարգաւաճ Հայաստան» կուսակցութեան անդամ, Հայաստանի նախկին արտաքին գործոց նախարար Վարդան Օսկանեան հանդէս եկած է յայտարարութեամբ` բացատրելով, թէ ինչո՛ւ կը դադրեցնէ իր անդամակցութիւնը ԲՀ կուսակցութենէն: Օսկանեանի գրասենեակին տարածած հաղորդագրութեան մէջ ըսուած է.

««Բարգաւաճ Հայաստան» կուսակցութեանն անդամակցութիւնս դադրեցնելու իմ որոշումիս պատճառը այն է, որ կուսակցութիւնը, իմ գնահատումով, չկրցաւ իրականացնել հայ ժողովուրդի բացարձակ մեծամասնութեան ցանկութիւնը` այս փուլին արմատական փոփոխութիւններ իրականացնելու եւ երկիրը ոչ միայն ծանր վիճակէն դուրս բերելու, այլեւ զարգացման ճիշտ եւ առողջ ճանապարհի վրայ դնելու:

«ԲՀԿ-ին անդամակցութիւնս կը դադրեցնեմ` գիտակցելով անոր անյաջողութեան մէջ պատասխանատուութեան իմ բաժինս:

«Անոնք, որոնք կը չարախնդան կուսակցութեան շուրջ ստեղծուած իրավիճակի վրայ, առաջին հերթին պէտք է լուրջ մտահոգութիւն ունենան երկրին մէջ ստեղծուած քաղաքական վիճակին համար: Այստեղ խնդիրը ոչ թէ ԲՀԿ-ն է, այլ անոր եւ անոր ղեկավարին նկատմամբ վերջին շրջանին իրականացուած միջոցները:

«Իշխանական բոլոր լծակներու կամայական, խտրական եւ հակասահմանադրական օգտագործումը առաջին հերթին մեծ հարուած էր Հայաստանի միջազգային հեղինակութեան:

«Երկրորդ, որ աւելի կարեւոր է, այդ գործողութիւնները կոտրեցին հայ ժողովուրդի` երկրին մէջ անյապաղ արմատական փոփոխութիւններ իրականացնելու յոյսը` անկէ բխող բոլոր հետեւանքներով:

«Կը շնորհաւորեմ Նաիրա Զոհրաբեանը կուսակցութեան ղեկը ստանձնելու համար: Ատիկա, կը կարծեմ, ճիշտ որոշում էր կուսակցութեան քաղաքական խորհուրդին կողմէ: Կուսակցութիւնը ունի գիտակից եւ նուիրուած քաղաքական աշխատակազմ, որ, յուսով եմ, կը շարունակէ պայքարը երկրին մէջ քաղաքական մենաշնորհի դէմ, ինչպէս նաեւ քաղաքական մթնոլորտի առողջացման համար: Յաջողութիւն կը մաղթեմ իմ գործընկերներուս իրենց յետագայ գործունէութեան մէջ»:

 

Հայաստանի նախկին արտաքին գործոց նախարար Վարդան Օսկանեան ԲՀԿ-ին անդամակցած էր 2012-ի Փետրուարին:

Այսօր ԲՀԿ-ի նախագահի պաշտօնէն եւ կուսակցութենէն հեռանալու դիմում  ներկայացուցած էր նաեւ կուսակցութեան ղեկավար Գագիկ Ծառուկեան: ԲՀԿ արտահերթ համագումարին կուսակցութեան նախագահ ընտրուած է ԲՀԿ խորհրդարանական խմբակցութեան քարտուղար Նաիրա Զոհրաբեան:

LEAVE A REPLY

Please enter your comment!
Please enter your name here