Ազգային Բարերար Ալեքքօ Պեզիքեան Պարգեւատրուեցաւ Սփիւռքի Նախարարութեան Ոսկի Մետալով

0
194

ԵՐԵՒԱՆ.– 17 Յունիսին Հայաստանի Սփիւռքի նախարարութեան կեդրոնին մէջ հիւրընկալուած են ազգային մեծ բարերարներ Ալեքքօ եւ Անի Պեզիքեանները, որոնք Հայաստան կը գտնուին Պեզիքեան ընտանիքին կողմէ Երեւանի մէջ կառուցուած եւ կահաւորուած «Անի Պեզիքեան երիտասարդական կեդրոն»ի բացման առիթով:

Հանդիպումէն առաջ ներկաները մէկ վայրկեան լռութեամբ յարգած են ազգային մեծ բարերար Գըրք Գըրգորեանի յիշատակը:

Այնուհետեւ, ողջունելով հիւրերը՝ նախարար Հրանոյշ Յակոբեան գնահատանքի եւ երախտագիտութեան ջերմ խօսքեր ուղղած է անոնց: «Պեզիքեան ընտանիքը առաջիններից մէկն էր, որ 1988 թուականի ահեղ երկրաշարժից յետոյ ձեռք մեկնեց Հայաստանին եւ այդ ժամանակից ի վեր դարձաւ Սփիւռք-հայրենիք կամուրջն ամրապնդողներից: Այս ընտանիքը ոչ միայն Հայաստանում է իրականացնում բարեգործական նախաձեռնութիւններ, այլեւ բազում հայանպաստ ծրագրեր է հովանաւորել եւ հովանաւորում Սփիւռքում:

Առաջիկայ օրերին Բէյրութին մերձակայ Ջիբէյլ քաղաքում գտնուող «Թռչնոց բոյն» որբանոցի տարածքում կը բացուի Պեզիկեան ընտանիքի միջոցներով կառուցուած թանգարանը, որը իւրայատուկ յուշահամալիր է՝ նուիրուած Հայոց Ցեղասպանութեան ու հայ որբերի պատմութեանը», յայտնած է նախարարը՝ աւելցնելով, որ Ալեքքօ եւ Անի Պեզիքեանները իրենց հայրենասիրական զգացումները լիովին կը փոխանցեն իրենց զաւակներուն ու թոռներուն: Հայրենիքի հանդէպ պարտքի զգացումը ամրապնդելու նկատառումով է, որ Երեւանի մէջ բացուած երիտասարդական կեդրոնը կը կրէ անոնց թոռնուհիին՝ 9ամեայ Անիին անունը, որ հաւանաբար ամէնէն փոքր բարերարն է Հայաստանի մէջ եւ կը գիտակցի իր դերին կարեւորութիւնը, ըսած է նախարարը։

Մանրամասնօրէն անդրադառնալով եւ կարեւոր նկատելով Պեզիքեան ընտանիքին կողմէ իրականացուած հայրենասիրական, բարեսիրական եւ այլ ներդրումները՝ նախարար Հրանոյշ Յակոբեան Ալեքքօ Պեզիքեանը պարգեւատրած է Սփիւռքի նախարարութեան բարձրագոյն պարգեւով՝ Ոսկի մետալով:

Շնորհակալութիւն յայտնելով գնահատանքին համար՝ Ալեքքօ Պեզիքեան նշած է, որ ազգային խոր գիտակցութիւնը եւ հայրենիքին հանդէպ ունեցած պարտքի զգացումը ժառանգած է իր ընտանիքէն եւ կը փորձէ փոխանցել ապագայ սերունդներուն։

«Մեր երազն է հայրենիքը եւ սփիւռքը տեսնել ապահով, հզօր եւ միասնական: Մենք կը հաւատանք, որ կարելի է ամէն բանի հասնիլ, եթէ կայ հաւատք, ձգտում եւ նուիրում: Այդ հաւատքով է, որ մեծ սիրով կը ծառայենք մեր ազգին ու հայրենիքին», յայտնած է Ալեքքօ Պեզիքեանը:

LEAVE A REPLY

Please enter your comment!
Please enter your name here