Նախագահը Ներկայ Գտնուած Է «Վիքիմետիա Հայաստան» Գրասենեակի Բացման եւ Այցելած՝ «Միր» Հեռուստաընկերութիւն

0
139

Նախագահ Սերժ Սարգսեան այսօր ներկայ գտնուած է «Վիքիմետիա Հայաստան» գիտակրթական հասարակական կազմակերպութեան գրասենեակի բացումին:

ՀՀ Նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութեան փոխանցմամբ` ՀՀ նախագահը այցելած է գրասենեակ, ծանօթացած է «Վիքիմետիա Հայաստան»-ի գործունէութեան եւ յառաջիկայ ծրագիրներուն:

Նախագահին ներկայացուցած են, որ որպէս «Վիքիմետիա» հիմնադրամի հայաստանեան մասնաճիւղ հիմնադրուած «Վիքիմետիա Հայաստան»-ի նպատակն է` խթանել վիքի նախագծիերու տարածումը եւ զարգացումը Հայաստանի ու տարածաշրջանի մէջ, հանրայնացնել ազատ գիտելիքի գաղափարը:

Գրասենեակի ժողովասրահին մէջ Սերժ Սարգսեան մասնակցած է Հայաստանի մէջ վիքի նախագիծերու զարգացման վերաբերող հարցերու քննարկման, որուն մասնակցած են նաեւ ՀՀ կրթութեան եւ գիտութեան նախարար Արմէն Աշոտեանը, ՀՀ մշակոյթի նախարար Յասմիկ Պօղոսեանը, «Ինթելեկթուալ Ռենեսանս» հիմնադրամի տնօրէն Յակոբ Յակոբեանը, հիմնադիր Արթուր Ջանիբեկեանը, «Վիքիմետիա Հայաստան» ՀԿ նախագահ Սուսաննա Մկրտչեանը, «Վիքիմեդիա» հիմնադրամի խորհուրդի նախագահ Եան Պարթ տէ Վրիտը, հիմնադրամի կրանտներու բաժնի եւ միջազգային հիւսիսային համագործակցութեան ղեկավար Ասաֆ Պարտովը, «Վիքիփետիա» կրթական ծրագրի ղեկավար Աննա Կովալը, «Եւրոպեանա Գլամ» վիքի ծրագրի համակարգող Ուիլիըմ Վիաթը, «Ինթելեկթուալ Վերածնունդ» հիմնադրամի տնօրէն Մարինա Սուլթանեանը եւ ծրագիրներու համակարգող Արմէն Մարտիրոսեանը:

«Վիքիմետիա Հայաստան» կազմակերպութեան գրասենեակի բացման արարողութեան ծիրէն ներս մասնակիցները դիտած են նաեւ «Ինթելեկթուալ Ռենեսանս» հիմնադրամի եւ «Վիքիմետիա Հայաստան» գիտակրթական հասարակական կազմակերպութեան համագործակցութեան արդիւնքները ներկայացնող տեսանիւթ:

Հանրապետութեան նախագահը «Վիքիմետիա Հայաստան»-ի գրասենեակէն ետք այցելած է «Միր» միջպետական հեռուստառատիօ ընկերութեան ազգային մասնաճիւղ, որուն.Յունիս 18-ին ՀՀ կառավարութեան որոշմամբ յատկացուած է 60 միլիոն դրամ` Երեւանի մէջ տեղակայուած երկրային արբանեակային կայանի վերազինման համար:

Սերժ Սարգսեան շրջայցի ժամանակ ծանօթացած է ընկերութեան տեխնիկական հնարաւորութիւններուն, վերազինման ընթացքին եւ այդ ուղղութեամբ յառաջիկայ ընելիքներուն, զրուցած` մասնաճիւղի աշխատակիցներուն հետ: Նախագահին ներկայացուած են «Միր» հեռուստառատիօ ընկերութեան ազգային մասնաճիւղի կողմէ պատրաստուող արտադրանքը, անոր ծաւալները, ստեղծագործական խումբի կողմէ պատրաստուող հաղորդումները, որոնք Հայաստանը կը ներկայացնեն մօտ 162 միլիոն դիտող ունեցող «Միր«-ի լսարանին:

 

LEAVE A REPLY

Please enter your comment!
Please enter your name here