2015ի «Էլիս Այլընտ» Պատուոյ Շքանշանին Արժանացողներէն՝ Մայք Սարեան

0
123

Ինչպէս հաղորդած էինք, Միացեալ Նահանգներու Ազգային ազգագրական կազմակերպութիւններու համախմբումը Մայիս 9ին, 2015ի «Էլիս Այլընտ» պատուոյ շքանշանը շնորհած էր 85 քաղաքացիներու, որոնցմէ եօթն՝ հայեր:

«Էլիս Այլընտ»ի այս տարուան հայ շքանշանակիրներն մէկն է մեր համայնքէն ներս իր բազմաթիւ բարերարութիւններով ծանօթ Մայք Սարեան:

Մայք Սարեան առողջապահական սպասարկութիւններ տրամադրող եւ Քալիֆորբիոյ Օնթարիօ քաղաքին մէջ հաստատուած «Փրայմ Հելթքեր Սըրվիսըզ» ընկերութեան նախագահն է։ Ան աւելի քան 25 տարիներու վարչական փորձառութիւն ունի առողջապահութեան մարզին մէջ եւ այդ ոլորտէն ներս ամենաբարձրաստիճան ամերիկահայ պաշտօնատարը կը հանդիսանայ։

Սարեան նաեւ գործօն անդամ մըն է Քալիֆորնիոյ հիւանդանոնցերու միութեան վարչութեան, որուն հովանիին տակ կը գործեն աւելի քան 500 հիւանդանոցներ եւ առողջապահական կեդրոններ։
Նաեւ, ան կամաւոր սպասարկութիւններ կը տրամադրէ Միացեալ Նահանգներու եւ Քանատայի տարածքին գործող մարդասիրական եւ առողջապահական կազմակերպութեանց վարչութիւններու անդամակցելու միջոցաւ, ինչպէս նաեւ կ՛օժանդակէ հայկական զանազան կազմակերպութեանց, ներառեալ՝ Ամերիկայի Հայ Դատի յանձնախումբին, ՀՕՄին, Հայ մշակութային հիմնարկութեան, Համազգայինին, ՀԲԸՄին, ինչպէս նաեւ Սահակ Մեսրոպ վարժարանին եւ շարք մը եկեղեցիներու։
Միայն անցեալ տարի, Մայք Սարեան աւելի քան 2 միլիոն տոլար արժող բժշկական սարքաւորումներու նուիրատուութիւնը ապահոված էր Հայաստանի 15 հիւանդանոցներու համար, իսկ այս տարի, Միացեալ հայկական հիմնադրամին կողմէ կը ղրկէ քանի մը միլիոն տոլարի բժշկական սարքաւորումներ, որոնք պիտի բաժնուին Հայաստանի առողջապահական նախարարութեան կողմէ:

Մայք Սարեան յոյժ կարեւոր կը նկատէ Սփիւռքի մէջ հայկական ինքնութեան պահպանումն ու հայութեան միասնակամութիւնը։ Ան Լիբանանի մէջ հասակ նետած է՝ երազելով տեսնել անկախ Հայաստան մը։ Իր նոր երազն է տեսնել միացեալ եւ անկախ Հայաստան մը, որպէսզի կարելի ըլլայ հայկական եռագոյնին ծածանումը ապահովել Արարատի վրայ։

Միացեալ Նահանգներու ժողովուրդին, ինչպէս նաեւ Քալիֆորնիոյ եւ Հայաստանի հայութեան մատուցած իր սպասարկութիւններուն շնորհիւ է, որ ան արժանացած է հեղինակաւոր «Էլիս Այլընտ» պատուոյ շքանշանին։

LEAVE A REPLY

Please enter your comment!
Please enter your name here