Սպանիոյ Արտաքին Գործոց Նախարարը Կոչ Կ՛ուղղէ Սուրիոյ Վարչակարգին Հետ Բանակցելու

0
128

Սպանիոյ արտաքին գործոց նախարար Խոսէ Մանուել Կարսիա Մարկալլօ երէկ այցելեց Թեհրան, ուր հանդիպում ունեցաւ Իրանի նախագահ Հասան Ռուհանիի եւ արտաքին գործոց նախարար Մոհամետ Ճաւատ Զարիֆի հետ:

Ան Թեհրանի մէջ տրուած մամլոյ ասուլիսի մը ընթացքին յայտնեց. «Ժամանակը հասած է ձեռնարկելու Սուրիոյ նախագահ Պաշշար Ասատի վարչակարգին հետ բանակցութիւններու` արգելք հանդիսանալու համար, որ ՏԱՀԵՇ այդտեղ տեղի ունեցող պատերազմը օգտագործէ գետնի վրայ իր յառաջխաղացքը շարունակելու համար»` աւելցնելով.«Պաշշար Ասատի կառավարութիւնն է, որ զայն հաւնինք կամ ոչ, միջազգային օրինականութիւն ունի եւ ան է, որ ՄԱԿ-ի մէջ աթոռ ունի»:

Ան նշեց, որ ինք կը յիշէ այն խօսքը, որ փետրուար 2012-ին մէկը Միւնիխի մէջ խորհրդաժողովի մը ընթացքին Պաշշար Ասատի մասին ըսած էր, թէ անոր «օրերը հաշւուած են»` աւելցնելով.«Չորս տարի անցաւ, անոր օրերը այլեւս հաշւուած չեն: Տագնապը ստեղծեց բաց մը, զոր կ՛օգտագործէ ՏԱՀԵՇ, ինչպէս նաեւ մարդասիրական տագնապ մը, որ աննախադէպ է»:

«Խաղաղութեան կը հասնին միշտ թշնամիին հետ բանակցելով: Տարակարծիք ըլլալու եւ գետնի վրայ կացութիւնը ընդունելու անհրաժեշտութեան միջեւ տարբերութիւն կայ», ըսաւ սպանական դիւանագիտութեան պետը` աւելցնելով.«Եթէ կ՛ուզենք, որ այս կացութիւնը չշարունակուի, պէտք է բանակցութեան սեղան նստինք, սահմանադրութեան բարեփոխում արտօնող շրջագիծ կազմենք եւ հրաւէր ուղղենք պարկեշտ ընտրութիւններու, որոնք կ՛արտօնեն, որ երկրին մէջ իշխանութիւնը ստանձնէ ժողովրդավարական վարչակարգ մը»:

Իրանի նախագահ Հասան Ռուհանի իր կարգին յայտարարեց.«Սուրիացի ժողովուրդն է, որ իր ճակատագիրը կ՛որոշէ եւ կ՛ընտրէ իր ուզած կառավարութիւնը»:

Ան նշեց, որ Սուրիոյ հարցին մէջ աշխարհի դիմագրաւած խնդիրը առաջնահերթութիւնները ճշդելն է` աւելցնելով.«Պատրաստ ենք Սուրիոյ մէջ կայունութեան հաստատման համար երկխօսութիւն կատարելու որեւէ երկրի հետ»:

LEAVE A REPLY

Please enter your comment!
Please enter your name here