Քաղաքացիական Շարժումը Բազմամարդ Ցոյց Մը Կատարեց Դէպի Նըժմէ Հրապարակ

0
209

Քաղաքացիական շարժումը համակարգող «29 օգոստոս» արշաւը երէկ երեկոյեան ժամը 5:00-ին կատարեց քայլարշաւ մը, որ սկսաւ Պուրճ Համուտէն` Պէյրութ գետի կամուրջէն եւ ուղղուեցաւ մինչեւ Նըժմէ հրապարակ:

Բազմամարդ այս ցոյցը կազմակերպող արշաւներն ու շարժումները հաստատեցին, որ իրենց ընտրած քայլարշաւի ուղին պատահական չէ, այլ` նպատակներ կը հետապնդէ:

«Հոտերնիդ ելաւ» արշաւի անդամները շեշտեցին, որ այդ ցոյցը Պուրճ Համուտէն կը սկսի` մերժելու համար Պուրճ Համուտի աղբանոցը վերաբանալու առաջարկը, որ ներկայացուած է երկրագործութեան նախարար Աքրամ Շեհայէպի ծրագիրով:

Անոնք նշեցին, որ ներքին ճամբով դէպի Նահատակաց հրապարակ եւ ապա Նըժմէ հրապարակ հասնելիք բողոքի ցոյցին երկրորդ հանգրուանն է Ելեկտրականութեան ընկերութիւնը, ուր անոնք ելեկտրական հոսանքի ընդհատումին դէմ արտայայտուեցան:

Ապա ցուցարարները ուղղուեցան Նահատակաց հրապարակ, ուր տասնեակ հազարաւոր քաղաքացիներ համախմբուեցան «Նահար» օրաթերթի խմբագրատան դիմաց եւ փորձեցին մուտք գործել դէպի Պէյրութի քաղաքապետարանի փողոցը` մուտք գործելու համար Նըժմէ հրապարակ:

Ցոյցին ընթացքին խօսք առաւ քաղաքացիական ընկերութեան շարժումի գործիչ Աժուատ Այաշ, որ բացարձակապէս մերժեց Նաամէի աղբանոցին բացումը` ընդգծելով, որ անիկա անկարելի պիտի ըլլայ եւ պետութեան սպառնալով մագլցողական ամէն ձեւի եւ միջոցի դիմել` արգիլելու համար այդ աղբանոցին եօթնօրեայ վերաբացումը:

Ապա ցուցարարները փորձեցին եւ  յաջողեցան ճեղքել ապահովութեան ուժերուն կազմած մարդկային շղթան ու հասան խորհրդարանին զուգահեռ փողոցը:

Նշենք, որ «Նահար» օրաթերթի խմբագրատան դիմաց արձանագրուեցան բախումներ` նկատի ունենալով, որ քաղաքացի մը բարձրացուցած էր պաստառ մը, որուն վրայ տպուած էին խորհրդարանի նախագահ Նեպիհ Պըրրիի, նախկին վարչապետ Սաատ Հարիրիի եւ Ընկերվար յառաջդիմական կուսակցութեան ղեկավար, երեսփոխան Ուալիտ Ժոմպլաթի լուսանկարները` «Փտածութեան խորհրդանիշներ» մեկնաբանութեամբ:

Բախումները արձանագրուեցան խորհրդարանի նախագահ Նեպիհ Պըրրիի համակիր տղոց եւ ցուցարարներուն միջեւ:

Աւելի ուշ ներքին ապահովութեան ուժերն ու խռովարար արարքները զսպող ուժերը տեղի տուին եւ ցուցարարները կրցան մուտք գործել Պէյրութի քաղաքապետարանի փողոցը, ուրկէ անոնք երեկոյեան ժամը 9:00-էն ետք հեռացան` առանց ցոյցի նոր թուականի կամ վայրի մասին յայտարարութիւն կատարելու:

Միւս կողմէ, շաբաթ օր երեկոյեան ժամը 6:00-էն սկսեալ Ռիատ Սոլհ հրապարակին վրայ կազմակերպուեցաւ «Մատչելի գիներու շուկայ» մը` «Հաշուետուութեան պիտի կանչենք» արշաւին կողմէ:

Այս նախաձեռնութիւնը կազմակերպուեցաւ պատասխանելու համար Պէյրութի առեւտրականներու միութեան նախագահ Նիքոլա Շամմասի, որ յայտնած էր, թէ ինք կը մերժէ Կեդրոնական Պէյրութը մատչելի գիներով առեւտրական շուկայի կամ կեդրոնի վերածել:

«Հաշուետուութեան պիտի կանչենք» արշաւին կազմակերպած այս շուկային մասնակիցները մատչելի գիներով իրեր եւ սննդեղէն վաճառեցին` շեշտելու համար, որ Պէյրութի շուկան այս կամ այն դասակարգին չէ սահմանուած, այլ բոլոր քաղաքացիներուն կը պատկանի:

 

LEAVE A REPLY

Please enter your comment!
Please enter your name here