Թուրքիոյ Մէջ Օտարերկրեայ Դիւանագէտներուն Կոչ Ուղղած են Դատապարտելու Հայերու Հանդէպ Ցեղապաշտական Դրսեւորումները

0
110

Սփիւռքի մէջ բնակող հայ փաստաբաններու հիմնած «Հայ իրաւաբանական միութիւն» կազմակերպութիւնը վերջին շրջանին  Թուրքիոյ մէջ հայերու նկատմամբ ատելութիւն պարունակող յայտարարութիւններու աճին ու հայկական «Քամփ Արմէնի» որբանոցին վրայ կատարուած յարձակումներու կապակցութեամբ նամակ  հրապարակած է:

Ըստ Ermenihaber.am-ի` նամակը ուղարկուած է Թուրքիոյ մէջ ԱՄՆ-ի, Գանատայի Ֆրանսայի, Մեծ Բրիտանիոյ, Իտալիոյ, Աւստրալիոյ, Գերմանիոյ, Պելճիգայի, Յունաստանի, Սպանիոյ, Զուիցերիոյ, Ռուսաստանի, Լիբանանի, Եգիպտոսի եւ Քոլումպիոյ հիւպատոսարաններուն:

Ըստ Թուրքիոյ մէջ հրապարակուող հայկական «Ակօս» թերթի` նամակին մէջ օտարերկրեայ դիւանագիտական առաքելութիւններուն կոչ կ’ուղղուի դատապարտել հայերու դէմ կազմակերպուող հրահրումները: Կազմակերպութեան նախագահ Հարրի Տիգրանիանի գրած նամակին մէջ կը խօսի Քամփ Արմէնի վրայ կատարուած յարձակումներուն, թուրք ոստիկանի` քիւրտերուն հասցէին ըրած «Դուք բոլորդ հայ էք», ազգայնականներու` «Ճիզրէն քիւրտերու համար, Քուրթուլուշն ալ հայերու համար  գերեզմանոց պիտի դառնայ» եւ նմանատիպ այլ արտայայտութիւններու մասին:

Նամակին մէջ հիւպատոսարաններուն կոչ կ’ըլլայ աջակցելու պաշտօնատար անձանց կողմէ հայերու նկատմամբ ատելութիւն սերմանող յայտարարութիւններու կանխարգելման գործին:

LEAVE A REPLY

Please enter your comment!
Please enter your name here