Արազ Պուչաքճեան Արժանացաւ ՄԱԿ-ի Լուսանկարչութեան Մրցանակին

0
158

Պէյրութի մէջ ՄԱԿ-ի տեղեկատուական կեդրոնին հովանաւորութեամբ, «Էքթ» միութիւնն ու «Սմարթ սենթըր» կեդրոնը կազմակերպեցին «Հանրային ծառայութիւնը լուսանկարի մէջ» խորագիրը կրող լուսանկարչական մրցում մը` ՄԱԿ-ի հիմնադրութեան 70-ամեակին առիթով:

Լիբանանի «Ազդակ» օրաթերթի փոխանցած տեղեկութիւններով՝ այս մրցանքին մասնակիցներէն Արազ Պուչաքճեան արժանացաւ լուսանկարչութեան մրցանակին` ընտրելով «ՄԱԿ-ը կը ծառայէ հանրութեան» նիւթը:

Ա. Պուչաքճեան ծանօթ է բազմաթիւ կազմակերպութիւններու եւ միութիւններու, որոնք կը գործեն ՄԱԿ-ի ներքեւ` աւելցնելով, որ ինք կ՛ապրի Պեքաայի մէջ սուրիացի գաղթականներուն յատուկ վրանաքաղաքին մօտ:

Ա. Պուչաքճեան ուղղուած էր այդ գաղթակայանը եւ լուսանկարած սուրիացի գաղթական մանուկները: «Մրցանակին շահող լուսանկարը եղաւ այն, որ առնուած է, երբ երեկոյեան գաղթական երեխաներուն թէյ խմելու ընթացքին ելեկտրական հոսանքը կ՛ընդհատուի եւ անոնք իսկոյն կը դիմեն ՄԱԿ-ի կողմէ իրենց տրամադրուած լուսարձակներուն: Լուսանկարը ցոյց կու տայ երեխաներուն լուրջ դէմքերը, որոնք մութին մէջ շատ տպաւորիչ յայտնուած են», նշեց ան:

Ա. Պուչաքճեան փոքր հասակէն կը լուսանկարէ եւ անոր նախընտրութիւնն է իր յիշատակները լուսանկարներով պահպանել, իսկ երեխաները նկարելու կարելիութիւնը ամէնէն աւելի կը հետաքրքրէ զինք:

Սիրողական մօտեցումով լուսանկարող Ա. Պուչաքճեան յայտնեց, որ յաւելեալ ինքնավստահութենէ ետք ինք կը մտածէ իր լուսանկարներուն ցուցահանդէս մը կազմակերպել եւ կամ իբրեւ լուսանկարիչ աշխատիլ լրագրութեան մարզին մէջ:

ՄԱԿ-ի կողմէ մրցանակը շահելուն առիթով Ա. Պուչաքճեան շնորհակալութիւն յայտնեց ՄԱԿ-ի գործիչներուն, յատկապէս սուրիացի գաղթականներուն նկատմամբ անոնց ցուցաբերած օժանդակութեան համար:

LEAVE A REPLY

Please enter your comment!
Please enter your name here