Իսլամացուած Հայերու Մասին «Լռութեան Ժառանգութիւնը» Վաւերագրական Ժապաւէնը Կը Հասնի PriMed 2015ի Փառատօնի Աւարտական Հանգրուան

0
123

Ֆրանսայէն Աննա Պենժամանի եւ Կիյոմ Քլերի պատրաստած իսլամացուած հայերու մասին «Լռութեան ժառանգութիւնը» վաւերագրական ժապաւէնը մուտք գործած է PriMed 2015 ժապաւէնի փառատօնի աւարտական հանգրուան, կը տեղեկացնէ մեզի պաշտօնակից «Հորիզոն» շաբաթաթերթը:
52 վայրկեան տեւողութեամբ ժապաւէնը կը ներկայացնէ պատմութիւնը Արմէնի, Տողուքանի, Եաշարի եւ Նազլիի, որոնք թուրք են կամ քիւրտ, եւ որոնք սակայն վերջին տարիներուն յայտնաբերած են, որ հա՛յ են, ինչ որ անոնց կեանքին մէջ կը ստեղծէ իրարանցում:
1915ին անոնց ծնողները կամ մեծ ծնողները Հայոց Ցեղասպանութենէն վերապրած են իրենց իսկական ինքնութիւնը գաղտնի պահելով: Ոմանք փրկուած են թուրք եւ քիւրտ ընտանիքներու կողմէ: Բոլորը ձուլուած են, իսլամացուած եւ մոռցուած:
Այսօր՝ մէկ դար շարունակ վախէ, լռութենէ եւ ամօթէ ետք, այդ պատմութիւնը կը բացայայտուի:
Վերջին տասը տարիներուն հետզհետէ մեծաթիւ թուրքեր կը յայտնաբերեն իրենց ընտանեկան գաղտնիքը եւ կը յայտարարեն, որ հայկական ծագում ունին: Մինչ հայերը ամբողջ աշխարհի տարածքին կը նշեն Ցեղասպանութեան 100ամեակը՝ «Լռութեան Ժառանգութիւնը» ժապաւէնը կը ներկայացնէ իսլամացուած հայերը, որոնց թիւը Թուրքիոյ մէջ այսօր աւելի քան մէկ միլիոն է:

ԲԵՄԱԴՐԻՉՆԵՐ
ԱՆՆԱ ՊԵՆԺԱՄԱՆ
ԵՒ ԿԻՅՈՄ ՔԼԵՐ

2012ին Սթրազպուրկի լրագրութեան դպրոցէն վկայեալ Աննա Պենժամէն «Լռութեան Ժառանգութիւնը» վաւերագրական ժապաւէնը կը պատրաստէ աշխատակցելէ ետք բազմաթիւ լրատուամիջոցներու հետ, ինչպէս «Լը Մոնտ»ի, «Թէ.Էֆ.1»ի, վերջինիս կայքին «Էլ.Սէ.Ի.»ի եւ «Ռիւ89»ի հետ: Ան համահեղինակն է համացանցային վաւերագրական երկու ժապաւէններու՝ «Պաղեստինցիներ, Մայրեր, Հայրենիք» եւ «Պատերազմի Ժամանակաշրջանի Ուսանողներ»:
Կիյոմ Քլեր ծնած է Սինկափուր եւ ապրած Փորթուկալ, Ֆրանսա եւ Լիբանան, ապա իր ուսման մէկ մասը կատարած է Լատին Ամերիկայի մէջ: Ան միշտ ալ հետաքրքրուած է ինքնութեան վերաբերող հարցերով: Ան նաեւ ուսած է Սթրազպուրկի լրագրութեան դպրոցը:

LEAVE A REPLY

Please enter your comment!
Please enter your name here