Համաժողովի մասնակիցները ներկայ գտնուեցան Ճարտարապետներու օրուան նուիրուած հանդիսութեան

0
102

Հայոց ցեղասպանութեան 100-րդ տարելիցի ծիրէն ներս Հոկտեմբեր 5-ին Ճարտարապետներու օրուան նուիրուած ձեռնարկներով մեկնարկեց Ճարտարապետներու համահայկական 3-րդ համաժողովը, որ կազմակերպած են ՀՀ սփիւռքի եւ քաղաքաշինութեան նախարարութիւնները, Ճարտարապետներու եւ ճարտարագէտներու համահայկական ընկերակցութիւնը, ՀՀ Ճարտարապետներու միութիւնը:

Համաժողովի մասնակիցները այցելեցին Ծիծեռնակաբերդ եւ ծաղիկներ խոնարհեցին Հայոց ցեղասպանութեան անմեղ զոհերու յուշակոթողին, որմէ յետոյ Քաղաքաշինութեան նախարարութեան նախաձեռնութեամբ տեղի ունեցաւ Ճարտարապետներու օրուան նուիրուած հանդիսութիւնը:

Բացման խօսքով հանդէս եկաւ ՀՀ վարչապետ Յովիկ Աբրահամեան: Շնորհաւորելով  հայաստանցի եւ սփիւռքահայ ճարտարապետները մասնագիտական տօնին առթիւ`  ան վարչապետի յուշամետալներով պարգեւատրեց ոլորտի  շարք մը վաստակաշատ մասնագէտներու:

Ողջոյնի խօսքով հանդէս եկաւ ՀՀ սփիւռքի նախարար Հրանոյշ Յակոբեան: Ան մասնաւորապէս նշեց. «Սիրելի՛ ճարտարապետներ, ձեր ստեղծագործ միտքն աշխարհի ամենատարբեր երկրներում իրաւամբ թողել է հայկական հետքեր: Տարբեր երկրներում վեր խոյացող հիասքանչ կոթողների ստեղծման գործում իրենց ներդրումն ունեն նաեւ ունեն հայ ճարտարապետները: Դեռ 2009թ. Ճարտարապետների համահայկական 1-ին համաժողովի արդիւնքում ձեւաւորուած մասնագիտական ընկերակցութիւնն այս տարիներին ակտիւ գործել է, ինչի արդիւնքում աշխարհով մէկ սփռուած հայ ճարտարապետները հնարաւորութիւն են ունեցել ներկայացնել  բազմաթիւ համատեղ նախագծեր»:

Սփիւռքի մէջ հայկական արուեստը տարածելու եւ ճանաչելի դարձնելու, ինչպէս նաեւ իրենց ստեղծագործական գործունէութեամբ Հայաստան-Սփիւռք գործակցութեան զարգացման գործին մէջ ներդրում ունենալու համար նախարար Հրանոյշ Յակոբեան ՀՀ սփիւռքի նախարարութեան «Արշիլ Կորքի» մետալներով պարգեւատրեց «Տունպէյթ» ընկերութեան համանախագահներ Րաֆֆի եւ Վիգէն Թարխանեանները, որոնք «Թռչնոց բոյն» որբանոցի «Արամ Պեզիքեան» թանգարանի նախագծման եւ ձեւաւորման աշխատանքներու հեղինակներն են (Լիբանան), Ճարտարապետներու եւ ճարտարագէտներու համահայկական ընկերակցութեան (համանախագահներ Գոհար եւ Վահէ Թութունճեաններ, Քաթար), Իրանի հայ ճարտարապետներու եւ ճարատարագէտներու միութեան (նախագահ Պեռնարտ Տրոր, Իրան) եւ «Հայճար» ճարտարապետներու եւ ճարտարագէտներու միութեան (միութեան նախագահ Ժան Կաւրիլոֆ, միութեան հիմնադիր, նախկին նախագահ Նազարէթ Պինաթլի, Թուրքիա):

Հայ ճարտարապետներուն ողջունեց եւ մի  քանի  ճարտարապետի քաղաքապետարանի Ոսկէ մետալներով պարգեւատրեց Երեւանի քաղաքապետ Տարօն Մարգարեան:

Ճարտարապետներու միութեան նախագահ Մկրտիչ Մինասեան ուրախութեամբ արձանագրեց, որ վերջին տարիներուն հայ ճարտարապետի միջազգային օրը Հայրենիքի մէջ կը նշուի ՀՀ կառավարութեան աջակցութեամբ:

Հանդիսութեան աւարտին ՀՀ քաղաքաշինութեան նախարար Նարեկ Սարգսեան խօսեցաւ հայ ճարտարապետներու գալիք ծրագիրներուն մասին: Ան նշեց, որ սփիւռքահայ ճարտարապետներէն կ’ակնկալեն ոլորտին մէջ նորագոյն արուեստագիտութիւններու ներդրման նախաձեռնութիւններ:

Համաժողովի մասնակիցները ՀՀ քաղաքաշինութեան նախարարութեան ճարտարապետութեան ազգային թանգարանին մէջ մասնակցեցան նաեւ «Մասունքներ… ծանօթ եւ անծանօթ Պալեանները» ցուցահանդէսի բացման: Պալեանները XVIII–XIX դարերու ճարտարապետներու գերդաստան էին Կոստանդնուպոլսոյ մէջ:  Հիմնուելով բիւզանդական ու հայկական ճարտարապետութեան աւանդոյթներուն ատոնց համադրման եւ արեւմտեան ճարտարապետութեան նորագոյն ձեռքբերումներուն վրայ` անոնք եւրոպականացուցած են թրքական ճարտարապետութիւնը  եւ նախանշած անոր  զարգացման ուղիները:

Ճարտարապետներու համահայկական 3-րդ համաժողովը պիտի շարունակէ իր աշխատանքները Հոկտեմբեր 6-ին եւ 7-ին:

 

LEAVE A REPLY

Please enter your comment!
Please enter your name here