Հանրօգուտ Շինութեանց Խորհրդարանական Յանձնախումբի Նիստը Վերածուեցաւ Կռիւի Առիթի Մը

0
118

Հանրօգուտ շինութեանց խորհրդարանական յանձնախումբի նիստը երէկ առաւօտեան ժամը 10:30-ին գումարեց նիստ մը` նախագահութեամբ երեսփոխան Մոհամետ Քապպանիի:

Նիստին ներկայ գտնուեցան նաեւ ուժանիւթի եւ ջուրի հարցերու նախարար Արթիւր Նազարեան, ելեւմուտքի նախարար Ալի Հասան Խալիլ եւ Հաշուեքննիչ ատեանի նախագահ, դատաւոր Խալիլ Համտան:

Նիստին սկիզբը Ազգային ազատ հոսանք կուսակցութեան եւ Մուսթաքպալ հոսանքի երեսփոխաններուն միջեւ արձանագրուեցաւ բանավէճ մը, որուն շրջագիծին մէջ Ազգային ազատ հոսանք կուսակցութեան երեսփոխանները Քապպանին մեղադրեցին ստախօսութեամբ, իր կարգին, Քապպանի զանոնք ամբաստանեց գողութեամբ:

Այս պատճառով Քապպանի անմիջապէս յայտարարեց նիստին աւարտը, ինչ որ պատճառ դարձաւ բանավէճը վերածելու կռիւի` երեսփոխաններ Զիատ Ասուատի եւ Ժամալ Ժարրահի միջեւ:

Կռիւը հակակշիռի տակ առաւ Հաւատարմութիւն դիմադրութեան երեսփոխանական պլոքի անդամ Ալի Ամմար, որ երկու երեսփոխանները իրարմէ բաժնեց:

Հինգ վայրկեան տեւած նիստէն ետք Քապպանի յայտնեց, որ յաջորդ նիստէն սկսեալ ինք պիտի արտօնէ, որ յանձնախումբին նիստը պատկերասփիւռի կայաններուն կողմէ ուղղակի սփռուի:

Ազգային ազատ հոսանք կուսակցութեան երեսփոխան Հիքմաթ Տիպ յայտնեց, որ իրենք խորհրդարանի նախագահ Նեպիհ Պըրրիէն պիտի պահանջեն երեսփոխան Քապպանիէն զատ ուրիշ մէկը նշանակել յանձնախումբի նախագահ:

Միւս կողմէ, յանձնախումբի նախագահի փոփոխութեան առաջարկին պատասխանելով, Մուսթաքպալ հոսանքի երեսփոխան Ահմետ Ֆաթֆաթ շեշտեց, որ ինք կը վստահեցնէ, թէ Ազգային ազատ հոսանք կուսակցութեան երեսփոխանները բոլորէն առաջ պիտի փափաքին Քապպանին յանձնախումբի նախագահ պահել, այլապէս այլ յանձնախումբերու նախագահներ իրենց կարգին կրնան պաշտօնանկ ըլլալ:

Իր կարգին, Մուսթաքպալ հոսանքի երեսփոխան Ժամալ Ժարրահ շեշտեց, որ ելեկտրականութեան առումով Ժըպրան Պասիլի օրով ստորագրուած բոլոր համաձայնագիրները ապօրինի են:

Փոփոխութիւն եւ բարեկարգում համախմբումի երեսփոխան Ֆատի Աուար յայտնեց, որ երեսփոխան Ժամալ Ժարրահի ներկայացուցած քաղաքական կողմը կարելի է նկատել աւազակութեան գործարանը:

Իսկ երեսփոխան Նեպիլ Նիքոլա հաստատեց, որ պատահածը խիստ մերժելի է, եւ պահանջեց երեսփոխան Քապպանին զրկել հանրօգուտ շինութեանց յանձնախումբի նախագահի պաշտօնէն:

LEAVE A REPLY

Please enter your comment!
Please enter your name here