Ֆրանսախօս Երկիրներու Համաժողովը Ընդունեց «Ցեղասպանութեան Կանխարգիլման Մասին» Բանաձեւը

0
110

10-11 Հոկտեմբերին Հայաստանի մէջ տեղի ունեցած Ֆրանսախօս երկիրներու միջազգային կազմակերպութեան նախարարական համաժողովի 31րդ նիստի շրջագիծին մէջ որդեգրուեցան հինգ բանաձեւեր, որոնց կարգին՝ Հայաստանի նախաձեռնած «Ցեղասպանութեան կանխարգիլման մասին» բանաձեւը: Այս մասին կը յայտնեն արտաքին գործոց նախարարութեան տեղեկատուական գրասենեակէն։
Անոր մէջ յղում կատարուած է 24 Ապրիլին Ֆրանսախօս երկիրներու միջազգային կազմակերպութեան գլխաւոր քարտուղար Միքայէլ Ժանի յայտարարութեան՝ Հայոց Ցեղասպանութեան 100ամեակին առիթով, ուր յարգանքի տուրք կը մատուցուի Մեծ Եղեռնի զոհերու յիշատակին եւ զօրակցութիւն կը յայտնուի հայ ժողովուրդին:
Բանաձեւին մէջ յատկապէս կը նշուի, որ կազմակերպութիւնը խստօրէն կը դատապարտէ մարդկութեան հսկայական կորուստներ պատճառած բոլոր ցեղասպանութիւնները եւ մարդկութեան դէմ յանցագործութիւնները, եւ յարգանքի տուրք մատուցելով այդ յանցագործութիւններու զոհերի յիշատակին՝ պարտաւորութիւն ունի միջոցներու ձեռնարկելու ցեղասպանութեան, մարդկութեան դէմ յանցագործութիւններու կանխարգիլման մեքանիզմները ամրապնդելու նպատակով:
Համաձայն ընդունուած բանաձեւին՝ կազմակերպութիւնը պարտաւոր է նաեւ ամրապնդել պետութիւններու եւ կառավարութիւններու միջեւ համագործակցութիւնը այդ յանցագործութիւններու պատասխանատուներուն անպատժելիութեան վերջ դնելու համար:
Նախարարական համաժողովը ընդունած է նաեւ հետեւեալ բանաձեւերը՝ Ֆրանսախօսութիւնը որպէս խաղաղութեան, հանդուրժողականութեան, բազմազանութեան, երկխօսութեան եւ փոխըմբռնման տարածքի մասին բանաձեւ, Կլիմայական փոփոխութեան մասին Միաւորուած ազգերու կազմակերպութեան շրջանակային ուխտի անդամ պետութիւններու 21րդ համաժողովի մարտահրաւէրներու մասին բանաձեւ, Փախստականներու եւ գաղթականներու մասին բանաձեւ, Ֆրանսախօսութեան կառոյցներուն երիտասարդութեան մասնակցութեան մասին բանաձեւ: Առաջին երկու բանաձեւերը ընդունուած են Հայաստանի նախաձեռնութեամբ:

LEAVE A REPLY

Please enter your comment!
Please enter your name here