Համազգայինի «Արեգ» Թատերախումբը` Միջազգային Մրցոյթներու Դափնեկիր

0
131

Համազգայինի «Արեգ» թատերախումբը հանրութեան ներկայացաւ հեղինակ, գեղարուեստական ղեկավար եւ բեմադրիչ Ռոպերթ Առաքելեանի «Ոսկի խնձորը» ամանորեայ երաժշտական թատերախաղով, ապա` Հայոց ցեղասպանութեան 100-ամեակին նուիրուած «Կարօտ» ներկայացումով:

«Կարօտ»-ը մարտ ամսուան ընթացքին ներկայացուեցաւ Պէյրութի եւ Այնճարի, ապա ապրիլ 24-ին դարձեալ Պէյրութի մէջ: Ներկայացման խտասալիկը մայիսին ցուցադրուեցաւ Գիւմրիի «Վերածնունդ» միջազգային եօթներորդ մրցոյթ-փառատօնին` աշխարհի շուրջ տասնհինգ երկիրներու թատերախումբերու շարքին գրաւելով երկրորդ տեղը:

Տարբեր երկիրներու մասնագէտներէ բաղկացած դատական կազմի որոշումով «Կարօտ»-ին շնորհուեցաւ միջազգային մրցոյթներու դափնեկիրի պատուաւոր կոչում:

Համազգայինի «Լ. Շանթ» կեդրոնի «Արեգ» թատերախումբի եւ Ռոպերթ Առաքելեանի նուաճած վկայագրերը եւ մետալը յունիս 25-ին Երեւանի մէջ բեմադրիչին յանձնեց փառատօնի պատասխանատուներէն փրոֆեսէօր Յովհաննէս Յովհաննիսեան: Հարկ է նշել, որ սկսած են «Արեգ»-ի նոր ներկայացման փորձերը, իսկ «Ն. Աղբալեան» եւ «Լ. Շանթ» կեդրոններուն մէջ գործող «Արեգ» թատերական դպրոցը կը շարունակէ նոր աշակերտներու ընդունելութիւնը` 2015-2016 ուսումնական տարեշրջանին համար, գեղարուեստական ղեկավար ունենալով Ռոպերթ Առաքելեանը: Կը շնորհաւորենք Համազգայինի ընտանիքը «Արեգ»-ի նուաճումներուն համար` մաղթելով ստեղծագործական նորանոր յաջողութիւններ:

LEAVE A REPLY

Please enter your comment!
Please enter your name here