«Պուրճ համուտի մէջ աղբ թափելը քննելի նիւթ չէ, իսկ Միշել Մըրի առաջարկը ապագայի ծրագիր մըն է, որ պէտք է ուսումնասիրել». շեշտեց Յակոբ Բագրատունի

0
120

ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ «Օ. Թի. Վի.» եւ «Էլ. Պի. Սի.» պատկերասփիւռի կայաններուն հետ իր ունեցած հարցազրոյցներուն ընթացքին վերահաստատեց, որ կտրականապէս կը մերժուի Պուրճ Համուտի մէջ բուռ մը աղբ թափել:

Անդրադառնալով երեսփոխան Միշել Մըրի կատարած երէկուան յայտարարութեան, թէ Պուրճ Համուտի տարածքին մէջ կը ծրագրուի հաստատել աղբերու զտման գործարան մը, Յ. Բագրատունի շեշտեց, որ անիկա նորութիւն մը չէ` աւելցնելով, որ 1990-ին զօր. Միշել Աունի կառավարութեան կողմէ տրուած որոշում մըն է, ուր կ՛ըսուի, թէ հարիւր հազար քառ. մեթրի հասնող տարածք մը պիտի յատկացուի Մեթնի քաղաքապետարաններու համադաշնակցութեան: «Ըստ այդ որոշումին, այդ տարածքին վրայ պիտի իրագործուի աղբերու զտման եւ փճացման ծրագիր մը: Բնականաբար ասիկա այսօրուան դրութեամբ գործադրուելիք ծրագիր մը չէ, եւ ոչ մէկ ձեւով առնչուած է Պուրճ Համուտի մէջ առողջապահական չափանիշներով աղբանոց հաստատելու կառավարութեան որոշումին, որ արդէն իսկ մերժած ենք», վերահաստատեց ան` հարիւրերորդ անգամ ըլլալով ըսելով, որ դէպի Պուրճ Համուտ նոր աղբեր բերելու եւ աղբանոց հաստատելու խնդիրը կարմիր գիծ է: «Այս հարցին մէջ մենք ոչ մէկ զիջում պիտի կատարենք: Սակայն եթէ նկատի ունենանք, որ աղբի տագնապին լուծման կառավարութեան ծրագիրին գործադրութենէն 18 ամիս ետք, իւրաքանչիւր քաղաքապետութիւն պէտք է իր աղբի հարցը լուծէ եւ անհրաժեշտ պարագային հաստատէ նաեւ համապատասխան գործարաններ, ապա այդ շրջագիծին մէջ հինէն եկող այս ծրագիրը արժանի է ուսումնասիրութեան: Ուսումնասիրութիւնը բնականաբար պիտի կատարուի Պուրճ Համուտի քաղաքապետական խորհուրդին կողմէ, այդ ծրագիրին ունենալիք կենսոլորտային ազդեցութիւնները պէտք է նկատի առնուին, ինչպէս նաեւ սերտուի աղբին քանակը», շեշտեց ան` աւելցնելով, որ Մըրի կատարած առաջարկը աղբերու զտման գործարանի հաստատում է եւ ոչ աղբերու հրկիզման գործարան:

Յ. Բագրատունի ընդգծեց, որ բոլորին համար պէտք է յստակ ըլլայ, որ ՀՅԴ Լիբանանի Կեդրոնական կոմիտէին սկզբունքային կեցուածքէն ոչինչ փոխուած է, ոչ մէկ ձեւով կարելի է Պուրճ Համուտի մէջ աղբ թափել, իսկ այն, ինչ որ հետագային ծրագրելի է, ապա անոր քննարկումը կը կատարուի ապագայ այլ առաջարկներու կողքին:

«Մտահոգիչ ոչ մէկ հարց կայ, ընդհակառակն` քայլ մը առաջ ենք` աղբերը զտելու եւ զանոնք Պուրճ Համուտէն դուրս փոխադրելու իմաստով», եզրափակեց Յ. Բագրատունի:

LEAVE A REPLY

Please enter your comment!
Please enter your name here