Լիբանանահայ գաղութը կորսնցուց վաստակաշատ դերասան եւ բեմադրիչ Վարուժան Խտըշեանը

0
191

Երէկ լիբանանահայ գաղութը կորսնցուց հայ ժողովուրդի արժանաւոր զաւակներէն, բազմավաստակ դերասան եւ բեմադրիչ Վարուժան Խտըշեանը, որ տասնամեակներ շարունակ իր անջնջելի դրոշմը դրաւ լիբանանահայ թատերական կեանքին վրայ:

Վարուժան Խտըշեան ծնած է 1937-ին, Ալէյ, Լիբանան: 16 տարեկանին սկսած է թատերական առաջին քայլերը Ժորժ Սարգիսեանի հետ:

1960-ին մեկնած է Լոնտոն, ուր հետեւած եւ աւարտած է Լոնտոնի «Վէպըր Տուկլաս աքատեմի աֆ տրամաթիք արթ» հիմնարկը:

1965-ին վերադարձած է Լիբանան եւ մաս կազմած Համազգայինի «Լեւոն Շանթ» թատերախումբին: Երկու տարի ետք հիմնած է «Թատրոն 67» թատերախումբը: Տարիներու ընթացքին «Թատրոն 67» եւ Համազգային «Գասպար Իփէկեան» թատերախումբին հետ ներկայացուցած է «Սալեմի վհուկները», «Գինը», «Կամուրջէն դիտուած», «Բոլոր զաւակներս», «Երկրորդ պողոտայի բանտարկեալը», «Կայսրը», «Հին աստուածներ», «Հանրային պարտէզի մէջ ոտաբոպիկ», «Երկնքի ճամբով», «Մեծ վարպետ Սոլենս», «Մինչեւ ո՞ւր», «Վենետիկի վաճառականը», «Շեփորդ հնչեցուր», «Մարա Սատ», «Վերակացուն», «Վենետիկեան երկուակներ», «Շերի նուար», «Բլրեցի Եփէն»,  «Ալաֆրանկա», «Հայաստանի լեռներուն սրնգահարը», «Արեւելեան ատամնաբուժը» եւ շարք մը այլ ներկայացումներ: Վ. Խտըշեան 1979-էն 1987-ին Հայաստանի մէջ բեմադրած է թատերական 5 ներկայացումներ եւ 1987-ին արժանացած «Պետրոս Ադամեան» շքանշանին (Խորհրդային ժամանակաշրջանին առաջին սփիւռքահայն էր, որ այս շքանշանը կը ստանայ): 2000-ին Մեծի Տանն Կիլիկիոյ Արամ Ա. կաթողիկոսի ձեռամբ կը պարգեւատրուի «Ս. Մեսրոպ Մաշտոց» շքանշանով: Նոյն տարին կը պարգեւատրուի նաեւ Համազգայինի Կեդրոնական վարչութեան կողմէ` Համազգայինի շքանշանով: 2004-ին կը պարգեւատրուի Լիբանանեան Համալսարանի Գեղարուեստի բարձրագոյն հիմնարկին շքանշանով:  2008-ին իբրեւ պարգեւատրում կը ստանայ Հայաստանի Հանրապետութեան մշակոյթի նախարարութենէն ոսկի մետալ: Ամենայն Հայոց Գարեգին Բ. կաթողիկոսին ձեռամբ կը պարգեւատրուի Ս. Սահակ Ս. Մեսրոպ շքանշանով:

Վ. Խտըշեան աւելի քան 20 տարի Լիբանանեան համալսարանին մէջ դասաւանդած է թատերական արուեստը: Երկար տարիներ ստանձնած է Համազգայինի «Գասպար Իփէկեան» թատերախումբի ղեկավարութիւնը:

Վ. Խտըշեան անգլերէնէ հայերէնի թարգմանած է 22 թատերական կտորներ:

Այս տխուր առիթով Հայաստանի մշակոյթի նախարար Յասմիկ Պօղոսեան Վարուժան Խտըշեանի ընտանիքին եւ գործակիցներուն յղեց ցաւակցագիր մը, որուն մէջ նշեց. «Մեր զօրակցութիւնն ենք յայտնում ձեզ` անհատուցելի կորստի ցաւը յաղթահարելու համար եւ մաղթում ենք ոգու ամրութիւն»:

 

 

LEAVE A REPLY

Please enter your comment!
Please enter your name here