ԱՄՆ Քոնկրեսական. ԼՂ Խնդրի Կարգավորման 3 Պահանջք Կայ

0
108

Միացեալ Նահանգները կը փորձէ նուազեցնել լարուածութիւնը ղարաբաղեան հակամարտութեան մէջ:

Այս մասին՝ ըստ «Ամերիկայի ձայն»-ին՝  յայտարարած է Քոնկրէսի Ներկայացուցիչներու պալատի արտաքին յարաբերութիւններու յանձնաժողովի նախագահ Էտ Ռոյս` ելոյթ ունենալով Ամերիկեան ձեռնարկատիրութեան հաստատութեան կողմէ կազմակերպուած քննարկման ընթացքին: Անցեալ շաբաթ քոնկրեսական Ռոյսի նախաձեռնութեամբ Արտաքին յարաբերութիւններու յանձնաժողովը Լեռնային Ղարաբաղի խնդրի կարգաւորման նուիրուած դռնփակ քննարկում կազմակերպած էր` ԵԱՀԿ-ի Մինսկի խումբի ԱՄՆ-ի համանախագահ Ջէյմս Ուորլիքի մասնակցութեամբ:

Յիշեցնենք, որ նախապէս Էտ Ռոյս եւ յանձնաժողովի ժողովրդավարական փոխնախագահ Էլիոթ Էնկել Պետական բաժանմունքին ղարաբաղեան խնդրի կարգաւորման վերաբերեալ յղած էին նամակ մը, որուն միացած էր 85 քոնկրեսական:

«Էլիըթ Էնկելն ու ես կը փորձենք «իջեցնել ջերմաստիճանը» այս տարածաշրջանին մէջ», – նշած է Ռոյս:

Քոնկրեսականին խօսքով, խաղաղութեան ապահովման եւ բռնութիւններուն վերջ տալու համար անհրաժեշտ է հայ-ատրպէյճանական սահմանին եւ ղարաբաղեան շփման գիծին վրայ տեղադրել կրակոցներու ուղղութիւնը որսացող սարքեր, միջազգային դիտորդներ կցել եւ պահանջել բոլոր կողմերէն դիպուկահարները ետ քաշել սահմանէն եւ շփման գիծէն:

«Եթէ այդ երեք պահանջները իրագործուին, ապա, անկախ փորձագէտներու եւ Փենթակոնի կարծիքով ատիկա կը բերէ շատ աւելի ապահով իրավիճակի: Այնպէս որ, մենք առաջ կը քաշենք այս երեք պահանջները», – նշած է Էտ Ռոյս:

Յիշեցնենք, Միացեալ Նահանգներու Պետական բաժանմունքը վերջերս հրապարակած էր յայտարարութիւն մը, որով կ՛ընդգծուէր ԱՄՆ-ի հաւատարմութիւնը հակամարտութեան խաղաղ կարգաւորման: Որպէս խաղաղութեան հաստատման հնարաւոր միջոց, Միացեալ Նահանգները կ՛առաջարկէ ընդլայնել ժողովուրդներու միջեւ երկխօսութիւնը:

Ինչպէս նշած է Պետական բաժանմունքի օգնական Ճոն Քըրպին, հայերն ու ատրպէյճանցիները իրարու կողքի ապրած են սերունդներով, եւ խաղաղութեան հասնելու համար անոնց անհրաժեշտ է կրկին սորվիլ վստահել իրարու:

LEAVE A REPLY

Please enter your comment!
Please enter your name here