Կարօ Փայլան Թուրքիոյ Խորհրդարանին Կ՛առաջարկէ Վերցնել «Ազգային Գաղտնաթիւ»ի Կիրառումը

0
111

ԵՐԵՒԱՆ, «Էրմենիհապեր».- Թուրքիոյ քրտամէտ Ժողովուրդներու ժողովրդավարական կուսակցութեան հայազգի պատգամաւոր Կարօ Փայլան Յունուար 14ին Թուրքիոյ խորհրդարանին առաջարկած է թրքական ինքնութեան փաստաթուղթերէն վերցնել կրօնքի մասին տեղեկութիւնը եւ դադրեցնել «ազգութեան գաղտնաթիւ»ի կիրառումը:

Փայլան նշած է, որ պետական մարմիններու մէջ ինք անձամբ բազմաթիւ առիթներով խտրական վերաբերմունքի արժանացած է, պարզապէս որովհետեւ իր ինքնութեան փաստաթուղթին մէջ նշուած է, թէ ինք քրիստոնեայ է: «Այդ պատճառով ալ, մէկ օրուան մէջ կատարուելիք գործը ինծի համար մէկ շաբաթ կամ 10 օր կը տեւէր», ըսած է ան:

Փայլան քննադատած է նաեւ ինքնութեան փաստաթուղթերուն մէջ կիրառուող «ազգութեան գաղտնաթիւ»ը՝ նշելով, որ անիկա խտրական վերաբերմունքի կ՛առաջնորդէ։

«Մեր՝ հայերուս, յատուկ թիւը 2ն է, յոյներունը՝ 1ը, հրեաներունը՝ 3ը, ասորիներունը՝ 4ը», յիշեցուցած է Փայլան՝ կոչ ընելով փոխելու Օսմանեան կայսրութենէն ժառանգուած եւ փոքրամասնութիւններուն նկատմամբ խտրականութիւն սերմանող այս վերաբերմունքը:

LEAVE A REPLY

Please enter your comment!
Please enter your name here