ԱՄՆ-ի Մէջ Լոյս Տեսած Է «Հրանդ Տինք. Թուրքիոյ Համրերու Հայ Ձայնը» Անգլերէն Վէպը

0
144

ԱՄՆ-ի մէջ լոյս տեսած է 2007 թուականին սպաննուած պոլսահայ լրագրող, Թուրքիոյ հայկական «Ակօս» թերթի հիմնադիր եւ գլխաւոր խմբագիր Հրանդ Տինքի  մասին պատմող առաջին ծաւալուն կենսագրական վէպը:

«Էրմենիհապեր»-ի փոխանցմամբ, թրքական «T24» լրատուակայքը կը յայտնէ, որ Մաուրին Ֆրիլէիի կողմէ անգլերէն թարգմանուած գիրքին թուրքերէն տարբերակը կը կոչուի «Հրանդ», հեղինակը Թուպա Չանտարն է: Անգլերէն թարգմանութիւնը լոյս տեսած է «Hrant Dink: An Armenian Voice of the Voiceless in Turkey / Հրանդ Տինք. Թուրքիոյ համրերու հայ ձայնը» վերնագիրով: Ըստ աղբիւրին` 736 էջնոց թրքերէն գիրքը թարգմանուած է կրճատումներով եւ անգլախօս ընթերցասէրին պիտի ներկայացուի  ընդամէնը 403 էջէ բաղկացած աշխատութեան տեսքով:

Գիրքին հեղինակ Թուպա Չանտարը երեք տարի աշխատած է Տինքի կենսագրական տուեալները, անոր մասին մտերիմներու, հարազատներու ու ծանօթներու յուշերը, անոր սակաւաթիւ ստեղծագործութիւններն ու ինքնակենսագրական նշանակութեան յօդուածները ի մի բերելու ուղղութեամբ: Այդ ընթացքին հեղինակը հանդիպած է 125 հոգիի հետ, կատարած է շուրջ 200 ձայնագրութիւն:

Գիրքը թրքերէնով լոյս տեսած է 2010-ի Սեպտեմբեր 15-ին` Հրանդ Տինքի ծննդեան օրը եւ կարճ ժամանակի ընթացքին յայտնուած է Թուրքիոյ մէջ ամենաշատ կարդացուող գիրքերու ցանկին առաջին տեղը:

Կենսագրականի անգլերէն թարգմանութեան ելեկտրոնային տարբերակը արդէն կը վաճառուի Amazon.com կայքին մէջ, իսկ տպագրուած տեսքով գիրքը գրախանութներուն մէջ պիտի յայտնուի Յունուար 31-էն:

LEAVE A REPLY

Please enter your comment!
Please enter your name here