Մուսթաֆա Քոչի Մահով՝ Կ՛արծարծուի Հայոց Գրաւեալ Ինչքերու Հարցը

0
196

ՊՈԼԻՍ.- Թուրքիոյ ամէնէն մեծ ընկերութիւններէն «Քոչ»ի տէրը՝ Մուսթաֆա Քոչ, մահացաւ Յունուար 21ին:

Թուրքիոյ ճարտարարուեստի բնագաւառի այս կարեւորագոյն դէմքին մահով, օրակարգի նիւթ դարձած է Հայոց Ցեղասպանութենէն ետք հայերէն գրաւուած ինչքերու հարցը:

Ընկերութիւնը հիմնուած էր 1920ին, մահացողին մեծ հօր՝ Վեհպի Քոչի կողմէ, որ բանուորի զաւակ էր: Վեհպի Քոչ Հայոց Ցեղասպանութեան զոհ դարձած հայ քաղաքացիներու ինչքերուն իւրացումով յաջողած է հիմնել իր հսկայ առեւտրական ընկերութիւնը: Նոյնն է պարագան Սապանճը ընտանիքին, որ նոյնպէս երկիրի ճարտարարուեստի հսկաներէն մէկն է:

Այս մասին բազմաթիւ գրութիւններ լոյս տեսած են թրքական մամուլին մէջ: Այդ թերթերու համացանցային տարբերակներու էջերուն վրայ հետաքրքրական է կարդալ նաեւ նշեալ գրութիւններուն տակ տեղ գտած ընթերցողներու մեկնաբանութիւնները, որոնք կը ցոլացնեն թուրք սովորական քաղաքացիին մօտեցումները:

Այդ տողերէն ամէնէն մեղմերուն մէջ կը թելադրուի «շատ չխառնել» եւ «չպեղծել ննջեցեալին յիշատակը», իսկ մեծամասնութիւնը կը գտնէ, որ հայոց ինչքերու իւրացման մասին պնդումները սուտ են, զրպարտութիւններ են, եւ նման բաներ ըսելը ազգին նկատմամբ դաւաճանութիւն է: Կայ աւելի հետաքրքրականը. ընթերցող մը կը քննադատէ յօդուածագիր մը՝ ենթադրելով. «Անպայման քու մեծ հայրդ չէ կրցած նոյնը ընել, ա՛յդ է պատճառը որ կը նախանձիս»:

LEAVE A REPLY

Please enter your comment!
Please enter your name here