Տիգրանակերտի Սուրբ Կիրակոս Եկեղեցւոյ Շուրջ Բուռն Կռիւներ

0
149

ՊՈԼԻՍ, «Մարմարա».- Թուրքիոյ արեւմտեան կողմը թերեւս շատ յստակ կերպով չի կրնար պատկերացնել, թէ ինչպիսի՛ դժոխային պայմաններու մէջ կը մնան երկրին հարաւ-արեւելեան մասերը։ Տիգրանակերտը եւ յարակից նահանգները ուղղակի ներքին պատերազմի պայմաններ կ՛ապրին։ Ամէնէն բուռն կռիւները կը շարունակուին Տիգրանակերտի Սուր գաւառակին մէջ, ուր 55 օրէ ի վեր փողոց ելլելու արգելք հռչակուած է։

Թուրքիոյ զինեալ ուժերը ամէն օր զինեալ բախումներ կ՛ունենան Քիւրտիստանի բանուորական կուսակցութեան հետ, գործողութիւններ կը կատարեն այս գաւառակին մէջ, որ օրէ օր աւերակ վիճակ կը ստանայ։ Հոն կը գտնուի հայկական նշանաւոր Սուրբ Կիրակոս եկեղեցին, որ նախապէս թեթեւ վնասներ կրած էր արդէն։

«Սէօզճիւ» թերթը Յունուար 25ին հաղորդեց, թէ այդ վայրերուն պատմական կարեւոր յուշարձանները լուրջ վտանգի ենթարկուած են, իսկ Սուրբ Կիրակոս եկեղեցին անոնցմէ մէկն է։ Եկեղեցին, որ վերջերս հրկիզուած Քուրշունլու մզկիթի ետին կը գտնուի, 2015ին արժանացած էր Եւրոպայի ամէնէն պատուաբեր մրցանակներէն մէկը նկատուող՝ Եւրոմիութեան մշակութային ժառանգութեան «Մեծ մրցանակ»ին:

Յիշեցնենք, որ 97 տարի կիսաւեր մնալէն ետք, Սուրբ Կիրակոս եկեղեցին, որ կառուցուած է 1376ին, վերանորոգուած եւ մեծ շուքով վերաբացուած էր 2012ին։

LEAVE A REPLY

Please enter your comment!
Please enter your name here