ԵԽԽՎ Մերժեց Արցախի Հարցին Առնչուող Ուոլթըրի Նախագիծը, Ընդունեց Մարքովիչինը

0
181

ԵՐԵՒԱՆ, «Ազատութիւն».– 26 Յունուարին, Եւրոպայի խորհուրդի Խորհրդարանական վեհաժողովը (ԵԽԽՎ) ա-ւարտեց երկու ոչ-հայանպաստ զեկոյցներու քննարկումը՝ ընդունելով մէկը, իսկ մերժելով միւսը։ Այս մասին գրած է «Ազատութեան» թղթակից Լուսինէ Մուսայէլեան։

Առաջինը Ռոպերթ Ուոլթըրի հեղինակած «Բռնութիւններու աճը Լեռնային Ղարաբաղի եւ Ատրպէյճանի այլ գրաւեալ տարածքներուն մէջ» խորագիրով բանաձեւի նախագիծն է, որ մերժուեցաւ։ Միւս փաստաթուղթը Սարսանգի ջրամբարին վերաբերեալ Միլիցա Մարքովիչի ներկայացուցած «Ատրպէյճանի սահմանային բնակչութիւնը միտումնաւոր կերպով զրկուած է ջուրէն» բանաձեւի նախագիծն է, որ ընդունուեցաւ, թէեւ ԵԽԽՎի ձմեռնային նստաշրջանէն առաջ վեհաժողովին ուղղուած յայտարարութեամբ ԵԱՀԿի Մինսկի խումբի համանախագահները կոչ ուղղած էին չդիմել այնպիսի քայլերու, որոնք կը բարդացնեն ղարաբաղեան հակամարտութեան խաղաղ լուծման բանակցային գործընթացը:

Բրիտանացի պատգամաւոր Ուոլթըրի նախագիծին թեր քուէարկեցին 66, դէմ՝ 70 խորհրդարանականներ, պոսնիացի Մարքովիչի նախագիծին թեր քուէարկեցին 98, դէմ՝ 71 պատգամաւորներ:

Յիշեցնենք, որ Ռ. Ուոլթըրի հեղինակած զեկոյցին մէջ կոչ կ՛ուղղուէր՝ «դուրս բերել հայկական զինուժը Լեռնային Ղարաբաղէն եւ Ատրպէյճանի միւս գրաւեալ տարածքներէն, հոն հաստատել Ատրպէյճանի լիակատար ինքնիշխանութիւն»: Հեղինակը կը նշէր, որ վերջին 20 տարիներուն ղարաբաղեան հակամարտութեան կարգաւորման առնչութեամբ յառաջընթաց չէ արձանագրուած, ուստի կոչ կ՛ուղղէր Մինսկի խումբին՝ վերատեսութեան ենթարկելու կարգաւորման առնչուած սկզբունքներն ու մօտեցումները:

Վեհաժողովին ընթացքին կարգ մը պատգամաւորներ իրենց խօսքին մէջ նկատել տուին, որ Ուոլթըր ներկայացուցած է միակողմանի փաստաթուղթ, ուր բացայայտ կերպով կ՛արտացոլայ բացառապէս ատրպէյճանական կողմին դիրքորոշումը: Ուրիշ խորհրդարանականներ ալ լուսարձակի տակ առին այն, որ բրիտանացի պատգամաւորը պարզապէս ներկայացուցած է պաշտօնական Պաքուի քարոզչութիւնը՝ դիտել տալով, որ իր փաստահաւաքի առաքելութեան ընթացքին Հայաստան եւ Լեռնային Ղարաբաղ չայցելած Ուոլթըր նոյնիսկ չէ համագործակցած կամ խորհրդակցած Մինսկի խումբի համանախագահներուն հետ, եւ իբրեւ հետեւանք՝ ներկայացուցած է ոչ առարկայական փաստաթուղթ մը։

Երկրորդ փաստաթուղթին մէջ, որ նոյնպէս բուռն քննարկման նիւթ դարձաւ վեհաժողովին, Լեռնային Ղարաբաղի Մարտակերտի շրջանին մէջ գտնուող Սարսանգի ջրամբարը որպէս սպառնալիք ներկայացնող Մարքովիչը, որ նաեւ չէ այցելած Սարսանգի ջրամբար, կը պնդէ, որ հայկական կողմը այդ ջրամբարը որպէս զէնք կը գործածէ, կը սպառնայ ատրպէյճանցիներուն եւ զանոնք կը զրկէ գիւղատնտեսութեամբ զբաղելու կարելիութենէն:

Որքան ալ այս պատգամաւորը փորձեց խնդիրը ներկայացնել որպէս բնապահպանական, մարդասիրական, բայց եւ այնպէս ելոյթ ունեցող խորհրդարանականներէն շատերն յայտարարեցին, որ Մարքովիչ հարցը կը շահարկէ՝ ստուերի մէջ ձգելով Մինսկի խումբի գործունէութիւնը:

Ընդհանուր առմամբ, ելոյթ ունեցող պատգամաւորներէն շատերը նկատել տուին, որ այս երկու զեկուցողները, որոնք իբր թէ կը փորձեն նպաստել ղարաբաղեան տագնապի գօտիին մէջ լարուածութեան մեղմացման, իսկութեան մէջ աւելի եւս կը սրեն իրավիճակը, քանի որ այս նախաձեռնութիւններէն դժգոհ են Հայաստանն ու Մինսկի խումբը, եւ գոհ է միայն Ատրպէյճանը:

LEAVE A REPLY

Please enter your comment!
Please enter your name here