ԵԽԽՎի Նոր Նախագահը Կաշառքներ Ստանալով՝ Աչք Գոցած Է Ատրպէյճանի Խախտումներուն Դիմաց

0
242

ՊՈԼԻՍ, «Մարմարա».- Եւրոխորհուրդի խորհրդարանական վեհաժողովի (ԵԽԽՎ) ձմեռնային նստաշրջանի առաջին օրը՝ Յունուար 25ին, կատարուեցաւ վարչական կազմի ընտրութիւն ու ԵԽԽՎի նոր նախագահի պաշտօնը ստանձնեց սպանացի երեսփոխան Փետրօ Ակրամունթ։

Եւրոպական մամուլը Ակրամունթի ընտրութենէն անմիջապէս ետք օրակարգի նիւթ դարձուց այն իրողութիւնը, որ նոր նախագահին անունը շրջանառութեան մէջ եղած էր, Ատրպէյճանի նախագահ Իլհամ Ալիեւի վարչակարգին հետ կաշառակերութեան կապերու պատճառով։ Կը յիշուի, որ սպանացի երեսփոխանը այն օրերուն, երբ Ատրպէյճանի գծով համազեկուցող էր ԵԽԽՎի մէջ, աչք փակած էր երկրին մէջ առկայ քաղաքական բռնաճնշումներուն նկատմամբ, քանի որ կաշառք ստացած էր Իլհամ Ալիեւի վարչակազմէն։

Գերմանական «Տոյչէ Վելլէ» կայքը կը գրէ, որ Ակրամունթ թանկարժէք նուէրներու դիմաց «չէր տեսներ» Ատրպէյճանի մէջ առկայ իրաւանց ոտակոխումները եւ քաղաքական բռնաճնշումները։ Թերթը կ՛անդրադառնայ նաեւ Ուքրանիոյ ճգնաժամին հետ կապուած Ակրամունթի երկակի ու հակասական յայտարարութիւններուն եւ Ատրպէյճանի կողմէ երկար ժամանակ իրագործուած «խաւեարային դիւանագիտութեան»։

«Քանի մը տարի առաջ, «Եւրոպայի կայունութեան նախաձեռնութիւն» կազմակերպութիւնը Ակրամունթը մեղադրած է կաշառակերութեան գործողութիւններու ամբաստանութեամբ։ Կազմակերպութիւնը Փետրօ Ակրամունթը ներկայացուցած էր իբրեւ մէկը ԵԽԽՎի այն երեք երեսփոխաններէն, որոնք ուրախութեամբ կ՛օգտուէին Ատրպէյճանի «խաւեարային դիւանագիտութենէն»։ «Խաւեարային դիւանագիտութիւն» եզրը առաջին անգամ գործածուած է Ատրպէյճանի մէջ մարդու իրաւունքներու խախտումներուն վերաբերեալ «Եւրոպայի կայունութեան նախաձեռնութիւն» կազմակերպութեան տեղեկագիրին մէջ։ Խօսքը այն մասին էր, թէ ինչպէս պաշտօնական Պաքուն, մարդու իրաւունքներու ոտնահարումներուն դիմաց աչք փակելու համար, թանկարժէք նուէրներով կը լռեցնէր Եւրոխորհուրդը։ Այդ ժամանակ Ատրպէյճանի գծով ԵԽԽՎի համազեկուցողն էր Ակրամունթ, որ կը գովէր Ալիեւի վարչակարգին քայլերը՝ անտեսելով այդ երկրին մէջ քաղաքական ճնշումները ու մարդկային իրաւունքներու կոպիտ խախտումները», կը գրէ «Տոյչէ Վելլէ»ն։

LEAVE A REPLY

Please enter your comment!
Please enter your name here