Տողան Թուրքիոյ Խորհրդարան Կը Հասցնէ Փոքրամասնական Վարժարաններու Դժուարութիւնները

0
165

ՊՈԼԻՍ, «Մարմարա».- Ընդդիմադիր Հանրապետական ժողովրդային կուսակցութեան Պոլսոյ երեսփոխան Սելինա Տողան, փոքրամասնական վարժարաններուն դիմագրաւած դժուարութիւնները հարթելու նպատակով, Թուր-քիոյ խորհրդարանին առաջարկ ներկայացուցած է՝ ըսելով. «Թուրքիոյ մէջ ոչ-իսլամ փոքրամասնութիւններու վարժարանները վերջին տարիներուն մեծ հարցեր կը դիմագրաւեն։ Հակառակ անոր որ փոքրամասնական վարժարաններուն մէջ կրթական իրաւունքները՝ Լօզանի համաձայնագիրի 40-41րդ յօդուածին հիման վրայ ապահովուած են, այս վարժարանները կը դիտուին որպէս առեւտրական հաստատութիւններ եւ անոնց դիմաց բազմաթիւ դժուարութիւններ կը յարուցուին։ Այս դժուարութիւնները հարթելու համար առաջարկ կը ներկայացնենք խորհրդարանին, որպէսզի այս նիւթին շուրջ հարկաւոր ուսումնասիրութիւնը կատարուի»։

Տողան շեշտած է, որ մինչեւ այսօր, ոչ-իսլամ փոքրամասնութիւններու  վարժարաններէն ո՛չ մէկը դիտուած էր որպէս առեւտրական շահու վրայ հիմնուած վարժարան։ 1936ին կիրարկութեան դրուած օրէնքով, այս վարժարանները եկամուտի եւ հաստատութիւններու տուրքերէն զերծ կացուցուած են։ Ան մատնանշած է, որ հակառակ մինչեւ այսօր կիրարկուած այս օրէնքին, վերջին տարիներուն փոքրամասնական վարժարանները մեծ դժուարութիւններ կ՛ապրին։ Մինչեւ այսօր, փոքրամասնական վարժարաններու ծնողներէն ստացուած արձանագրութեանց գումարներէն բաց մնացած բաժինները կը լրացուէին բարերարներու կողմէ։ Այնուհանդերձ, այդ գումարներն ալ բաւարար չէին ըլլար։ Կառավարութիւնը 2014-15 տարեշրջանէն սկսեալ, բոլոր փոքրամասնական վարժարաններուն նիւթական յատկացումներ տրամադրեց։ Այս կիրարկութիւնը, որ կը նախատեսէր վարժարաններու պիւտճէին բացերը գոցել, կարճ ժամանակ ետք հարցեր ստեղծեց։ Արդարեւ, փոքրամասնական վարժարանները, պետութեան կողմէ տրամադրուած այս օժանդակութեան պատճառով, դասուեցան շահ ապահովելու նպատակով հիմնուած մասնաւոր վարժարաններու կարգին, եւ ելեւմտական նախարարութիւնը սկսաւ տուրք պահանջելու փոքրամասնական վարժարաններէն։ Քննիչներ, երբ փոքրամասնական վարժարաններ այցելեցին քննութեան համար, ծնողներէն որպէս նուիրատուութիւն կատարուած գումարները ընդունեցին որպէս շահ եւ տեղեկագիրներ պատրաստեցին՝ շահու գումարներ պահանջելով։

Տողան ըսած է. «Եթէ պետութեան կողմէ կիրարկուած այս քաղաքականութիւնը շարունակուի, ապա փոքրամասնութիւններու վարժարանները փակուելու վտանգին դէմ յանդիման պիտի գտնուին։ Պէտք է շեշտել, որ փոքրամասնական վարժարանները միայն իրենց համայնքին պատկանող աշակերտները կրնան ընդունիլ։ Այս վարժարանները ակադեմական աշխատակազմի եւ դասագիրքերու ապահովման նիւթերուն շուրջ եւս լուրջ հարցեր կ՛ապրին։ Փոքրամասնական վարժարաններու մէջ ուսուցչական պաշտօն ստանձնելու համար, ուսուցման համալսարաններու բացակայութիւնը դժուարութիւններու տեղի կու տայ։ Փոքրամասնական վարժարաններուն մէջ պայման դրուած է, որ թրքերէնով դասաւանդելի նիւթերը ուսուցուին թուրք ուսուցիչներու կողմէ։ Այս կիրարկութիւնը փոքրամասնութեան պատկանող ուսուցիչներուն կողմէ կը դիմաւորուի հակազդեցութեամբ։ Այն համոզումը կը ստեղծուի, որ պետութիւնը չի վստահիր փոքրամասնութեանց անդամ ուսուցիչներուն։ Միաժամանակ, ուսուցիչներուն միջեւ կը ստեղծուի հաւասար վերաբերումի չարժանանալու զգացողութիւնը։ Սուրիոյ ներքին պատերազմին պատճառով, միլիոնաւոր սուրիացիներ ստիպուեցան Թուրքիա գաղթել։ Ասոնց միջեւ կը գտնուին Սուրիոյ հայրենակից հայ աշակերտներ։ Այս աշակերտները կ՛ընդունուին մեր հայկական վարժարանները ձրիօրէն, առա՛նց նիւթական ակնկալութեանց»։

Տողան իր ներկայացուցած գրութեան մէջ ակնարկած է նաեւ ասորի ժողովուրդին դիմագրաւած դժուարութիւններուն եւ նիւթը եզրափակած՝ ըսելով, որ այս եւ նմանօրինակ դժուարութիւններու պատճառով, Թուրքիոյ փոքրամասնութիւնները կրթական կեանքէն ներս մեծ դժուարութիւններու դէմ յանդիման կը գտնուին, եւ պահանջելով, որ խորհրդարանը այս նիւթը քննէ։

LEAVE A REPLY

Please enter your comment!
Please enter your name here