«Սփիւռքի Ներգրաւման Ռազմավարութիւնները» Թեմայով Դասախօսութիւն՝ ՀՀ Սփիւռքի Նախարարութենէն Ներս

0
226

Եւրոպական Միութեան նիւթական աջակցութեամբ եւ ՄԱԿ-ի մանկական հիմնադրամի, ՀՀ սփիւռքի նախարարութեան ու «Առաքելութիւն Արեւելք» կազմակերպութեան նախաձեռնութեամբ՝  Փետրուար 2-ին ՀՀ սփիւռքի նախարարութեան աշխատակազմին համար իրականացած է «Սփիւռքի ներգրաւման ռազմավարութիւնները» թեմայով դասախօսութիւն: Բանախօսը եղած է իռլանտական “Diaspora Matters” կազմակերպութեան գործադիր տնօրէն Քինկսլի Այքինսը: Այս մասին կը հաղորդէ ՀՀ սփիւռքի նախարարութեան մամուլի գրասենեակը։

ՀՀ սփիւռքի նախարար Հրանոյշ Յակոբեան ողջունած է հիւրը եւ շնորհակալութիւն յայտնած ՄԱԿ-ի մանկական հիմնադրամի հայաստանեան գրասենեակին` դասախօսութիւնը կազմակերպելու եւ իրականացնելու համար: Նախարարը նշած է, որ Իռլանտայէն հրաւիրուած դասախօսը միջազգային կարգի փորձագէտ է: Անոր ղեկավարած կազմակերպութիւնը խորհրդատուական ընկերութիւն է եւ կ՝ուղղորդէ կառավարութիւնները, կառոյցներն ու անհատները սփիւռքներու վերաբերեալ հարցերուն մէջ: «Կարծում եմ, որ նրա փորձը, դիտարկումներն ու հետազօտութիւները կարող են օգտակար լինել նաեւ մեզ համար»,- նշած է նախարարը:

Քինկսլի Այքինսը ներկայացուցած է Իռլանտայի տնտեսութեան մէջ եւ գործարարութեան ոլորտին մէջ սփիւռքի ներգրաւուածութեան բացառիկ ձեւաչափը: Ան նշած է յաջողութեան հասնելու կարեւոր գործօնները, Սփիւռքի նախաձեռնութիւններու ձախողման պատճառները, մարտահրաւէրներու եւ թերութիւններու հնարաւոր դրսեւորումները: Կարեւոր համարուած է այլ երկիրներու կողմէ Սփիւռքի խնդիրներու ուսումնասիրութիւնը, յատկապէս` տնտեսութեան եւ գործարարութեան զարգացումը, աշխատատեղերու ստեղծումը:

Այքինսը կարեւոր համարած է ցանցային կապերու ստեղծումը, վստահութեան ամրապնդումը, Սփիւռքը լսելը, ճկունութիւնը, յստակ ուղղորդուած ռազմավարութիւնը: Ան նշած է, որ յաջողութեան հասնելու համար անհրաժեշտ է յաջորդ սերունդի`  երիտասարդութեան հետ աշխատանքը, անոր ներգրաւուածութիւնը ծրագիրներուն մէջ եւ տարեցներու հետ աշխատանքի յատուկ ռազմավարութիւնը: Անոր համոզմունքով` Սփիւռքի խնդիրները կը դառնան շատ աւելի կարեւոր պետութիւններու, կառավարութիւններու համար: «Իւրաքանչիւր երկիր ունի սփիւռքի դրամագլուխ տարբեր մակարդակներու վրայ, որ կազմուած է մարդոցմէ, ցանցերէ, կապերէ, ֆինանսներէ ու գաղափարներէ»,- նշած է Քինկսլի Այքինսը:

Բոլոր հարցերը ամփոփուած են աշխոյժ քննարկումներով ու հետաքրքրական առաջարկներով, նախանշուած են յաջորդական քայլերը:

Նշենք, որ իռլանտական “Diaspora Matters” կազմակերպութեան գործադիր տնօրէն Քինկսլի Այքինսը 2011-ին հրատարակած է ձեռնարկ համաշխարհային սփիւռքի  ռազմավարութեան վերաբերեալ: 2012-ին Ուաշինկթընի մէջ հանդէս եկած է իբրեւ բանախօս Հիլըրի Քլինթընի կազմակերպած սփիւռքի համաշխարհային ֆորումին եւ 2013-ին գլխաւորած է Տուպլինի մէջ տեղի ունեցած Համաշխարհային սփիւռքի գիտաժողովը:

LEAVE A REPLY

Please enter your comment!
Please enter your name here