Մոսկուայի Համաձայնագիրը Չեղեալ Նկատելու Առաջարկ Ներկայացուած Է

0
140

ԵՐԵՒԱՆ, «Նիուզ».- Ռուսական «Իզվեսիտա»ն յայտնած է, որ խորհրդարանի Համայնավարական կուսակցութեան պատգամաւորներ Վալերի Ռաշկին ու Սերկէյ Օբուխով 16 Մարտ 1921ին ՌԽՖՍՀ իշխանութիւններուն եւ Թուրքիոյ միջեւ կնքուած «Եղբայրութեան եւ բարեկամութեան մասին պայմանագիրը» խզելու առաջարկով դիմած են նախագահ Վլատիմիր Փութինին եւ արտաքին գործոց նախարար Սերկէյ Լաւրովին։

«Թրքական յարձակողական ընթացքի աճի պարագային մենք այժմ պէտք է իրաւաբանօրէն մշակենք մեր երկիրին եւ դաշնակիցներուն համար ոչ շահաւէտ բոլոր ռուս-թրքական համաձայնութիւնները։ Անգարան պէտք է հասկնայ, թէ հակամարտութեան սրումը ինչի կրնայ վերածուիլ», ըսած է Օբուխով։

Սպրավեդլիվայա Ռոսիա կուսակցութեան պատգամաւոր Օլէգ Պախոլկովի համաձայն՝ Թուրքիան իրօք շատ ծանր պայմաններ առաջադրած է, ներառեալ՝ Լեռնային Ղարաբաղին վերաբերող կէտ։ «Սակայն թուրքերուն պէտք է դաստիարակել։ Այս աշխարհի վրայ ոչինչ յաւերժ է։ Եթէ դուք այսօր դաւաճան դիրքորոշում որդեգրած էք, ուրեմն պայմանագիրը խզելը համարժէք քայլ է։ Այդ հարցին մէջ Հայաստան մեզի կ՛աջակցի», ըսած է Պախոլկով։

Ան նշած է, որ նոյնիսկ եթէ պայմանագիրի խզումը մեծ իրաւաբանական ուժ չունենայ, սակայն անիկա կ՛արտայայտէ իրենց տարածքային յաւակնութիւնները, որոնց ռուսական կողմը համաձայն չէ։

Նշենք, որ Թուրքիոյ հետ «Բարեկամութեան եւ եղբայրութեան պայմանագիր»ի խզումը դիտարկուած էր նաեւ ասկէ առաջ։ Նացիականութեան դէմ տարած յաղթանակէն ետք Խորհրդային Միութիւնը պահանջած էր Անգարայի հետ նոր համաձայնագիր կնքել, սակայն Ստալինի մահէն ետք հրաժարած էր այդ առաջարկէն:

«Երեք անդրկովկասեան հանրապետութիւններէն երկուքը՝ Հայաստանն ու Վրաստանը, չեն ճանչնար պայմանագիրի պայմանները։ Պէտք է հասկնանք, որ 1921ին պոլշեւիկներու իշխանութիւնը կախեալ էր մազի բարակ թելէ մը», ըսած է Օբուխով։

Յիշեցնենք, որ, այդ պայմանագիրին համաձայն, Թուրքիոյ տրուած է Կարսի մարզի մեծ մասը, նախկին Պաթումի մարզի հարաւային հատուածը, Երեւանի նահանգի Սուրմալու գաւառը՝ Արարատ լերան հետ։

LEAVE A REPLY

Please enter your comment!
Please enter your name here