Թուրքիոյ Հետ 1921ի Մոսկուայի Պայմանագիրը Խզելու Առաջարկը Պիտի Ուսումնասիրուի. Զախարովա

0
145

ԵՐԵՒԱՆ, «Նիուզ».- Ռուսիոյ արտաքին գործոց նախարարութեան պաշտօնական բանբեր Մարիա Զախարովա տեղեկացուցած է, որ նախարարութիւնը պիտի ուսումնասիրէ Թուրքիոյ հետ բարեկամութեան՝ 1921ի պայմանագիրը խզելու մասին խորհրդարանի պատգամաւորներուն առաջարկը:

«Ռուսիոյ արտաքին գործոց նախարարութիւնը զանազան հարցադրումներ ստացած է Ռուսիոյ խորհրդարանէն խումբ մը պատգամաւորներէ՝ վերոյիշեալ պայմանագիրը խզելու մասին: Կրնամ ըսել, որ նախ հարցը պիտի ուսումնասիրուի եւ ճշդուի, թէ ճշգրիտ ի՞նչ կ՛առաջարկուի: Ըստ այդմ՝ ամէն ինչ պիտի կատարուի սահմանուած կարգին համաձայն: Առայժմ, պէտք է այդ նախաձեռնութիւնը ուսումնասիրել», Փետրուար 10ին ըսած է Զախարովա:

Յիշեցնենք, որ պատգամաւորներ Վալերի Ռաշկին եւ Սերկէյ Օբուխով նախագահ Վլատիմիր Փութինին եւ արտաքին գործոց նախարար Սերկէյ Լաւրովին առաջարկած են անվաւեր հռչակել Բարեկամութեան եւ եղբայրութեան մասին Մոսկուայի պայմանագիրը, որ Մարտ 16, 1921ին ստորագրուած է Ռուսիոյ եւ Թուրքիոյ միջեւ: Իրենց նամակին մէջ պատգամաւորները իբրեւ պատճառաբանութիւն ընդգծած են Թուրքիոյ յարձակողական ընթացքի հետեւողական գիծը:

LEAVE A REPLY

Please enter your comment!
Please enter your name here