Նշմար. Երբ «Սուլթան»Մ… Իրօք` Կը Դողդըղա՜յ «Ումո՜ւտլա՜րը՜մ` Հէ՛փ Քըրըլտը» Ռեճեփ Թ. Էրտողան

0
187

ՄԵԹՐ Գ. ՏԷՐՏԷՐԵԱՆ

«Սուլթան» Էրտողան Ա.-ի 2016 թ. փետրուար 11-ի պոռթկումը համաթրքական ժամանակավրէպ պատերազմի հռչակում մըն էր` բոլորին դէմ` խնայելով միայն սիոնական տարատնկեալ պետութեան եւ սէուտական յետամնացեալ տնկի թագաւորութեան:

Ներթրքական եւ արտաքին շրջանային ու միջազգային բոլոր ճակատներուն վրայ իր ապրած յուսաբեկումներէն խելագարած` «սուլթան»-ը կրակ բացաւ բոլորին դէմ` լոկ բառային ռումբերով, ոճով մը, որ «ուռուցիկ, բայց` ոչ պայթուցիկ, այլ թռուցիկ» պիտի բնութագրէր Յովհաննէս Աղպաշեան` «Խիկար»-ը, եթէ այսօր ողջ ըլլար:

Գազազած «սուլթան»-ին թիրախներէն էին` Էրտողանի սիւննի, սելճուքեան եւ օսմանեան Թուրքիոյ այժմու բոլոր թշնամիները, նախագահ Պաշշար Ասատը, նախագահ Վլատիմիր Փութինը, իսլամական շիի Իրանը, նոյնիսկ ՕԹԱՆ-ի իր մեծագոյն դաշնակից Միացեալ Նահանգները, արեւմտեան մամուլը, Եւրոպական միութիւնը, աշխարհը ներկայացնող ՄԱԿ-ը եւ բնականաբար` ՔԱԿ-ը:

Պաշշար Ասատի դէմ` քանի որ ան իր «թայէֆական» իշխանութեամբ կը ճզմէ Սուրիոյ սիւննի ժողովուրդը եւ սիւննի թիւրքմենները, Փութինի դէմ` որ Լաթաքիոյ գաւառին մէջ ցեղասպանութեան կ՛ենթարկէ սուրիացի ժողովուրդն ու թիւքմենները, Իրանի դէմ, որ նեցուկ կը կանգնի Պաշշար Ասատին եւ շիի միլիսներ կը ղրկէ Սուրիա` ջարդելու համար սիւննի զինեալներու խումբերը, Միացեալ Նահանգներու դէմ` հարց տալով նախագահ Օպամային, թէ «Ո՞վ է ձեր դաշնակիցը, Թուրքիա՞ն, թէ՞ քիւրտ ահաբեկիչ կազմակերպութիւնները», Արեւմտեան մամուլին դէմ, որ կը խանգարէ միլիոնաւոր սուրիացի փախստականներուն դիմաց միլիառներով տոլարներ կորզելու Թուրքիոյ պահանջներուն գոհացումը, Եւրոպական Միութեան դէմ, որ որձեւէգ խաբեպատիր ելոյթներ կ՛ունենայ Սուրիոյ եւ սուրիացի փախստականներուն առնչուող բոլոր հարցերուն մէջ, եւ` ՄԱԿ-ին դէմ, որ մերժեց ընթացք տալ Սուրիոյ հիւսիսային շրջանի օդային տարածքին վրայ արգիլելու ռազմական օդանաւերու թռիչքը`  ըստ Թուրքիոյ պահանջին… եւ` ՔԱԿ-ի դէմ, որ ահաբեկչական կազմակերպութիւն մըն է, եւ կը սպառնայ մասնատել Թուրքիան…:

«Սուլթան»-ը սպառնաց զինեալ միջամտութիւն կատարել Սուրիոյ դէմ` առանց հաշուի առնելու Ռուսիոյ եւ Իրանի կողմէ զինեալ հակադարձութեան հաւանականութիւնը, եւ` առանց ապահովելու Թուրքիոյ բանակին պատրաստակամութիւնը նման միջամտութեան համար, երբ, բանակին կարծիքով, Թուրքիա իր կողքին կրնայ ունենալ միայն «Յետամնաց Սէուտական Արաբիոյ Սալման թագաւորը»…

Խելագարած «սուլթան»-ը ամէնէն առաջ հաշուի չէ առած մանաւանդ Թուրքիոյ ներքին ճակատին վիճակը, որ պայթիւնավտանգ է ՔԱԿ-ի դէմ իր շղթայազերծած արիւնալի կատաղի պատերազմին պատճառով, եւ տակաւին, ՔԱԿ չէ օգտագործած Թուրքիոյ տարածքին վրայ իր ունեցած բոլոր կողմնակիցներն ու հնարաւորութիւնները:

Տակաւին, արդէն իսկ ճեղքեր սկսած են բացուիլ Արդարութիւն եւ բարգաւաճում կուսակցութենէն  ներս դժգոհելով «սուլթան»-ին վարած ներքին եւ արտաքին քաղաքականութենէն, զոր առաջին բացայայտողը եղաւ նախկին փոխ-վարչապետը` Պիւլենտ Արընչ, որուն ձայնակցեցան շարք մը Արդարութիւն եւ բարգաւաճում կուսակցական նախարարներ եւ երեսփոխաններ ներկայ խորհրդարանէն: Իսկ խելակորոյս «սուլթան»-ը այս այլախոհները ամբաստանեց որպէս դաւադիրներ եւ Ֆաթհուլլա Կիւլենի գործակալներ…

Այս անգամ «սուլթան»-ը զգուշացաւ իր ընդդիմադիրները «սիոնական» գործակալ հռչակել, քանի որ ներկայ պայմաններուն լոյսին տակ փանթուրքական-օսմանական Թուրքիոյ միակ դաշնակիցը կրնայ ըլլալ սիոնական տնկի պետութիւնը, իսկ Սէուտական Արաբիան թշնամին էր ոչ միայն օսմանեան պետութեան, այլեւ այսօր մրցակիցն է արդի Թուրքիոյ` սիւննի աշխարհի ղեկավարի պաշտօնին շուրջ…

Նաեւ այն պատճառով, որ Միացեալ Նահանգները ոչ միայն կը պաշտպանեն քրտական դեմոկրատական կուսակցութիւնը Սուրիոյ հիւսիսային Թուրքիոյ սահմաններուն վրայ, քանի որ կռուեցան «ՏԱՀԵՇ»-ին դէմ եւ պարտութեան մատնեցին զայն, իսկ միւս կողմէ` լուրեր կը տարածուին, թէ Միացեալ Նահանգները Էրտողանի դէմ ըմբոստացող, Արդարութիւն եւ բարգաւաճում կուսակցութեան տարրերը կը քաջալերեն շարունակելու «սուլթան»-ին դէմ շարժումը եւ կանաչ լոյս տուած է անոնց` ձերբազատելու «սուլթան»-էն եւ անոր ներքին եւ արտաքին քաղաքականութենէն եւ արգելք հանդիսանալ սահմանադրութեան փոփոխութեան եւ նախագահական վարչակարգի որդեգրումին:

Թուրքիոյ մէջ այսօր բուն թուրքերը եկած են այն հաստատ համոզումին, թէ` «թուրքը թուրքէն բացի բարեկամ չունի», իսկ սիոնափանթուրք քաղաքականութեան հետեւորդներուն համար, ի վերջոյ, միակ կողմնակիցը կը հանդիսանայ Թուրքիոյ նման տարատնկեալ սիոնական տնկի պետութիւնն է, որուն հետ անհրաժեշտ է վերականգնել նախկին զինակցութիւնը, եւ արդէն կը խօսուի դեսպաններու փոխանակումի մասին, որուն ակնդէտ կը սպասէ սիոնական տնկի պետութիւնը, որովհետեւ ինք եւս մեծապէս տուժած է շրջանային փոփոխութիւններէն, որոնք մեկուսացուցին թէ՛ Թուրքիան եւ թէ՛ Իսրայէլը…

Ցնցիչ անակնկալներով յղի է Թուրքիան այսօր` թէ՛ ներքին եւ թէ՛ շրջանային մակարդակներու վրայ:

Մենք չարախինդ գոհունակութեամբ կը սպասենք, որ խելագարած «սուլթան»-ը սխալի եւ դիմէ զինեալ միջամտութեան` Սուրիոյ մէջ, ուր տեղի կ՛ունենայ Գ. աշխարհամարտը` փոխանորդութեամբ:

Պէյրութ, 12 փետրուար 2016

LEAVE A REPLY

Please enter your comment!
Please enter your name here