Վերջին Հրաժեշտ` Վաստակաւոր Դերասան Եւ Բեմադրիչ Պերճ Ֆազլեանին

0
121

Երէկ` հինգշաբթի, 18 փետրուար 2016-ի յետմիջօրէի ժամը 1:00-ին, Անթիլիասի Ս. Գրիգոր Լուսաւորիչ Մայր տաճարին մէջ կատարուեցաւ լիբանանահայ վաստակաւոր թատերական գործիչ, դերասան, բեմադրիչ, ՀԲԸՄ-ՀԵԸ-ի «Վահրամ Փափազեան» թատերախումբի հիմնադիր-բեմադրիչ Պերճ Ֆազլեանի յուղարկաւորութեան արարողութիւնը` նախագահութեամբ Լիբանանի հայոց թեմի առաջնորդ Շահէ եպս. Փանոսեանի ներկայացուցիչ Նորայր արք. Աշըքեանի, ներկայութեամբ խորհրդարանի նախագահ Նեպիհ Պըրրիի եւ վարչապետ Թամմամ Սալամի ներկայացուցիչ Ղասսան Մուխայպերի, մշակոյթի նախարար Ռեմոն Արայժիի ներկայացուցիչ Միշել Մաայքիի, պետական երեսփոխան Յակոբ Բագրատունիի,  հանգուցեալի ընտանեկան պարագաներուն, հայ եւ օտար դերասաններու, բեմադրիչներու, գաղութի պատկան մարմիններու ներկայացուցիչներու եւ բարեկամներու:

Նորայր արք. Աշըքեան իր խօսքին մէջ յայտնեց, թէ մեծ էր Պերճ Ֆազլեանի ներդրումը մեր ժողովուրդի կեանքին մէջ` աւելցնելով, որ ան հայութեան մէջ ընդհանրապէս եւ լիբանանահայութեան մէջ մասնաւորաբար քաջածանօթ, սիրուած եւ յարգուած, բարի եւ բարեսէր, ժրաջան եւ աշխատասէր, արուեստագէտ եւ արուեստասէր հայորդի մըն էր: Ան ծնած էր հայութեան ամէնէն դժուարին օրերուն, երբ ջարդերէն հազիւ 10 տարիներ անցած էին: Նորայր արք. Աշըքեան նկատել տուաւ, որ Ֆազլեան վստահաբար  իր կեանքին մէջ մեծ դժուարութիւններ ու տառապանքներ ունեցաւ, սակայն չյուսահատեցաւ, աշխատեցաւ, տագնապեցաւ, պայքարեցաւ դժուարութիւններուն դէմ:

Այնուհետեւ սրբազանը կարդաց Լիբանանի հայոց թեմի առաջնորդ Շահէ եպս. Փանոսեանի դամբանականը, որուն մէջ առաջնորդ սրբազանը անդրադարձած էր Պերճ Ֆազլեանի կենսագրականին եւ գաղութին մէջ անոր ունեցած վաստակին:

Աւարտին, Նորայր արք. Աշըքեան Մեծի Տանն Կիլիկիոյ Արամ Ա. վեհափառ հայրապետին եւ միաբանութեան անունով իր խորին վշտակցութիւնը յայտնեց հանգուցեալի ընտանեկան պարագաներուն:

Յուղարկաւորութեան աւարտին հանգուցեալին մարմինը փոխադրուեցաւ Պուրճ Համուտի Ազգային գերեզմանատունը:

 

LEAVE A REPLY

Please enter your comment!
Please enter your name here