Ոչ Եւս է Ականաւոր Պատմաբան, Աղբիւրագէտ Պետրոս Յովհաննիսեանը

0
134

Այսօր առաւօտեան մահացած է ժամանակակից իրականութեան ամենալուսաւոր մարդոցմէ մէկը` պատմաբան, աղբիւրագէտ Պետրոս Յովհաննիսեանը: Այս մասին կը հաղորդէ Times.am-ը։

Պետրոս Յովհաննէսի Յովհաննիսեան ծնած է 1944 թուականի Յունիս 22-ին Գիւմրի` Հայոց Մեծ եղեռնէն մազապուրծ փրկուած երզնկացի Յովհաննէսի բազմանդամ ընտանիքին մէջ: Միջնակարգ կրթութիւնը ստացած է նոյն քաղաքի Վլ. Մայակովսքիի անուան թիւ 5 միջնակարգ դպրոցին մէջ, աւարտելէն յետոյ Պ. Յովհաննիսեանը յաջողութեամբ յանձնելով ընդունելութեան քննութիւնները, կ՝ընդունուի ԵՊՀ պատմութեան բաժանմունք` ընտրելով հայոց պատմութեան ուսումնասիրութեան բնագաւառը: Ուսումնառութեան շրջանին կը զօրակոչուի բանակ եւ` շուրջ երեք տարի խորհրդային բանակին մէջ ծառայելէ յետոյ, կը շարունակէ ուսումը ու 1970-ին կ՝աւարտէ ԵՊՀ պատմութեան բաժանմունքը: Նոյն թուականին կ՝ընդունուի ասպիրանտուրա Հայոց պատմութեան ամպիոնի գծով եւ 1976-ին յաջողութեամբ կը պաշտպանէ թեկնածուական ատենախօսութիւնը` փրոֆ. Ս. Պօղոսեանի ղեկավարութեամբ: Այնուհետեւ կ՝աշխատի Հայոց պատմութեան ամպիոնի մէջ իբրեւ գիտաշխատող, ամպիոնի վարիչ, աւագ դասախօս, ապա` դոցենտ, այժմ` փրոֆէսըր: 2013-էն մինչ օրս կը ղեկավարէր ԵՊՀ Հայոց պատմութեան ամպիոնի աշխատանքները:

Ընթերցող հասարակութեան մեծ մասին յայտնի են Պ. Յովհաննիսեանի հայ թագաւորներու, կաթողիկոսներու, հասարակական-պետական նշանաւոր գործիչներու մասին ՀՀ հանրագիտարաններու եւ «Քրիստոնեայ Հայաստան» հանրագիտարանի բազմաթիւ յօդուածները: Ան շարք մը գիտական խորհուրդներու անդամ էր եւ գիտական բազմաթիւ զեկուցումներով հանդէս եկած է հանրապետական ու միջազգային շարք մը գիտաժողովներու մէջ:

Իր գիտամանկավարժական անբասիր գործունէութեան համար 2009 թուականին Հանրապետութեան նախագահին հրամանագիրով Պ. Յ. Յովհաննիսեանին շնորհուած է Հայաստանի Հանրապետութեան վաստակաւոր մանկավարժի պատուաւոր կոչում:

LEAVE A REPLY

Please enter your comment!
Please enter your name here