Հովանաւորութեամբ Նախարար Ռամզի Ժրէյժի. Լուսանկարիչ Ժորժ Սեմերճեան Իր Նահատակութեամբ Եւ Րաֆֆի Պէրպէրեան Իր Ոսպնեակով Մասնակցեցան «Նահատակ Լուսանկարիչի Օր»-ուան Նշումին

0
141

Հովանաւորութեամբ տեղեկատուութեան նախարար Ռամզի Ժրէյժի եւ կազմակերպութեամբ Լուսանկարիչներու սենտիքային, երկուշաբթի, 22 փետրուար 2016-ին, կէսօրէ առաջ ժամը 11:00-ին, զբօսաշրջութեան նախարարութեան ապակեայ սրահին մէջ նշուեցաւ «Նահատակ լուսանկարիչի օր»-ը` «Մեր կեանքը աւելի զօրաւոր է, քան ձեր մահը» կարգախօսով: Լիբանանեան ուսումնասիրութեանց եւ հրատարակութեանց տնօրէնութեան հետ գործակցաբար իրագործուած այս ձեռնարկին ներկայ էին պետական պաշտօնական անձնաւորութիւններ, զբօսաշրջութեան նախարարութեան ընդհանուր տնօրէնը, մամլոյ ներկայացուցիչներ եւ լուսանկարիչներու խուռներամ բազմութիւն մը: Լուսանկարիչներու զանազան միութիւններու եւ սենտիքաներու անդամ 66 արհեստավարժ լուսանկարիչներ ցուցադրեցին իրենց «գլուխ գործոցները»` լիբանանեան առօրեայի զանազան մարզերուն եւ երեւոյթներուն շուրջ:

Այս առիթով լիբանանեան քայլերգի ունկնդրութենէն ետք յաջորդաբար խօսք առին տեղեկատուութեան նախարար Ռամզի Ժրէյժ, տեղեկատուութեան նախարարութեան ընդհանուր տնօրէն դոկտ. Հասսան Ֆալհա, լիբանանեան ուսումնասիրութեանց եւ հրատարակութեանց բաժանմունքի տնօրէն Խտըր Մաժետ եւ լուսանկարիչներու սենտիքայի նախագահ Ազիզ Թահեր:

«Կը խոնարհինք նահատակ լուսանկարիչներու յիշատակին առջեւ», ըսաւ նախարար Ռամզի Ժրէյժ` բարձր գնահատելով նահատակ լուսանկարիչներուն նուիրուած այս ձեռնարկը եւ նշեց, որ երբեմն իւրաքանչիւր նկար շատ սուղ եւ դառն պայմաններու մէջ, նոյնիսկ մահուան գնով կը ստացուի: Ան ողջունեց նահատակ լուսանկարիչները, որոնք իրենց կեանքին գնով ուզած էին իրականութիւնը փոխանցել, եւ թուեց նահատակ լուսանկարիչներու անունները, որոնց կարգին` Ժորժ Սեմերճեանը: Նախարար Ժրէյժ այս առիթով վերյիշեցուց լուսանկարիչի բարոյական պարտաւորութիւնները, ուր ան պարտի խուսափիլ կեանքի դառն ու քստմնելի պատկերները հանրութեան փոխանցելէ: Ան «անծանօթ զինուորներ» կոչեց լուսանկարիչները, որոնց  ներկայացուցած այս լուսանկարներուն առջեւ «կարելի չէ չզարմանալ ու չզմայլիլ»:

Դոկտ. Հասսան Ֆալհա նոյնպէս ողջունեց նահատակ լուսանկարիչներու յիշատակը` շեշտելով, որ հակառակ «մեր լուսանկարիչ գործընկերներու նահատակութեան, մենք պիտի շարունակենք անոնց առաքելութիւնը, որովհետեւ «մեր կեանքը աւելի զօրաւոր է, քան ձեր մահը»: Այս առիթով Ֆալհա յիշեցուց լուսանկարիչներու արդար իրաւունքներու ամբողջական հատուցման անհրաժեշտութիւնը:

Իր կարգին, Խտըր Մաժետ ողջունեց նահատակ լուսանկարիչները` շնորհակալութիւն յայտնելով այս ձեռնարկի իրագործման նպաստած բոլոր լուսանկարիչներուն, զբօսաշրջութեան նախարարութեան ընդհանուր տնօրէն Նատա Սարտուքի եւ բոլոր պաշտօնակիցներուն ու գործակիցներուն` խոստանալով  շարունակել տեղեկատուական մարզի բոլոր միաւորներուն հետ գործունէութիւնը` հովանաւորութեամբ նախարար Ժրէյժի եւ զօրակցութեամբ ընդհանուր տնօրէն Հասսան Ֆալհայի: Մաժետ ողջունեց ձեռնարկին մասնակից թէ նահատակ լուսանկարիչները, որոնք այս երկրին «հսկող արթուն աչքերն են»:

Լուսանկարիչներու սենտիքայի նախագահ Ազիզ Թահեր եւս իր խօսքին մէջ բարձր գնահատեց լուսանկարիչներու նահատակութիւնը վասն ճշմարտութեան եւ իրողութեան փոխանցման: Ան շնորհակալութիւն յայտնեց բոլոր անոնց, որոնք նպաստեցին ձեռնարկի յաջողութեան:

Սոյն ձեռնարկին իր մասնակցութիւնը բերաւ նաեւ Լուսանկարիչներու սենտիքայի անդամ Րաֆֆի Պէրպէրեան` լիբանանեան բանակին յատուկ զոյգ նկարներով: Այս առիթով ան «Ազդակ»-ի հարցումին պատասխանելով անհրաժեշտ տեղեկութիւններ փոխանցեց ձեռնարկի կազմակերպման ու անոր ընդգրկած լուսանկարչական խմբաւորումներու խորագիրներուն շուրջ, իր կարգին ընդգծելով իր վճռակամութիւնը` շարունակելու նահատակ լուսանկարիչներու առաքելութիւնը շեշտելով, որ «մեր կեանքը աւելի զօրաւոր է, քան անոնց կեանքը»:

LEAVE A REPLY

Please enter your comment!
Please enter your name here