Սերոբ Մեսրոպ Խաչատուրեանի Անհատական Ցուցահանդէսը «Այբ Թու Զետ» Արուեստի Վարժարանէն Ներս

0
150

Կազմակերպութեամբ «Այբ թու զետ» արուեստի վարժարանին, Երեքշաբթի, 23 Փետրուարին, երեկոյեան ժամը 6:00-ին, Անթիլիասի «Այբ թու զետ» արուեստի վարժարանին մէջ տեղի ունեցաւ Սերոբ Մեսրոպ Խաչատուրեանի անհատական ցուցահանդէսին բացումը: Այս մասին կը հաղորդէ Լիբանանի «Ազդակ» օրաթերթը։

«Այբ թու զետ» արուեստի վարժարանի տնօրէն Մարալ Փանոսեան բացատրեց, թէ այս անհատական ցուցահանդէսը արդիւնքն է չորս ամսուան ճնշուած աշխատանքի: Փանոսեան շարունակեց ըսելով, թէ Խաչատուրեանի փորթֆոլիոն պատրաստելու համար «Այբ թու զետ» վարժարանի վերջին դասընթացքի ծրագիրը խտացուցին եւ շնորհիւ արուեստագէտին խանդավառութեան ու հետեւողական աշխատանքին յաջողեցան ամբողջացնել փորթֆոլիոն եւ զայն ներկայացնել այս ցուցահանդէսին: Ան նաեւ յայտնեց, որ Խաչատուրեանի եւ իր առաջին հանդիպումը 2004-ին էր, որմէ մնացած է կիսաւարտ նկար մը, զոր արուեստագէտը անուանած է «2004, Մարալին հետ»: Սակայն Սերոբ Խաչատուրեան գեղանկարչութիւնը սիրած է մանկութենէն: Արդարեւ, ան հետեւած է գեղանկարչութեան դասերու Համազգայինի «Թորոս Ռոսլին» կերպարուեստի դպրոցին մէջ եւ հետագային մասնագիտացած է տեսողական հաղորդակցութեան մարզին մէջ: 2004-էն 2016 ստեղծագործական բացակայութենէ մը ետք, Խաչատուրեան կրկին դիմած է «Այբ թու զետ»-ին` անդրադառնալով, որ իր կոչումը արուեստի աշխարհին մէջ է: Այժմ, այս փորթֆոլիոյով եւ «Այբ թու զետ»-ի աջակցութեամբ, Խաչատուրեան կը պատրաստուի մեկնիլ Գերմանիա` մասնագիտանալու համար իր էութիւնը արտայայտող ասպարէզին մէջ:

Սերոբ Մեսրոպ Խաչատուրեան այս ցուցահանդէսը անուանած է «Փոթորիկը», իրավիճակներու եւ ապրումներու փոթորիկը: Խաչատուրեան վարպետութեամբ կը գործածէ իւղաներկը, մատիտը, ջրաներկը` միասնաբար գործածելով նաեւ տարբեր նիւթեր: Ցուցադրուած գեղանկարներուն միջեւ աչքի կը զարնէր Այվազովսքի մը. արուեստագէտը բացատրեց, թէ այդ գեղանկարը ուսումնասիրական աշխատանք մըն է, զոր կատարած է 2005-ին: Ան աւելցուց, թէ ուսումնասիրութիւնները անհրաժեշտ են արուեստագէտի մը կազմաւորման համար, սակայն պէտք է նաեւ ստեղծագործական ուղի մը գտնել իւրայատուկ գիծ մը զարգացնելու համար իբրեւ արուեստագէտ: Խաչատուրեանի մատիտով պատրաստուած գեղանկարներուն միջեւ յատկանշական են պարային կեցուածքներ արտայայտող գործերը` «Պարողներ» եւ «Ակադեմական հաւասարակշռութիւն»: Ան մեկնաբանեց ըսելով, թէ շարժումը զինք շատ կը հետաքրքրէ, իսկ պարը արուեստի լեզուով թարգմանուած շարժումն է, որուն տարբեր անկիւնները կը փափաքի հետագային յայտնաբերել իր գործերուն ընդմէջէն:

Սերոբ Մեսրոպ Խաչատուրեանի «Փոթորիկը» անհատական ցուցահանդէսը բաց կը մնայ մինչեւ Շաբաթ, 27 Փետրուար, երեկոյեան ժամը 5:00-էն 7:00:

LEAVE A REPLY

Please enter your comment!
Please enter your name here