Գերմանիա Մինչեւ Ապրիլ 24 Պիտի Քննէ Հայոց Ցեղասպանութեան Բանաձեւը

0
145

ԵՐԵՒԱՆ.- Հայաստանի Հանրային ձայնասփիւռի կայանը կը հաղորդէ, թէ Գերմանիոյ խորհրդարանը Փետրուար 25ին քննած է Հայոց Ցեղասպանութեան առնչուող բանաձեւը, որ առաջադրուած էր «Դաշինք 90-Կանաչներ» կուսակցութեան կողմէ, եւ ուր կը պնդուէր, թէ 1915ին սկսած սպանդները պէտք է յստակօրէն ցեղասպանութիւն որակել:

Ուշ երեկոյեան սկսած բուռն քննարկումներէն ետք քուէարկութիւն տեղի չէ ունեցած, քանի որ կարելի չէ եղած համաձայնութիւն գոյացնել ընդդիմադիր ձախերուն եւ իշխող համախմբումին միջեւ:

Բուռն կերպով չհամաձայնելով վարչապետ Անկելա Մերքելի կուսակցութեան պատգամաւորներու որոշ դիտարկումներուն հետ՝ ձախակողմեաններու ղեկավարներէն Ճեմ Օզտեմիր առաջ քաշած է 3 նախապայմաններ, որոնց ընդունման պարագային միայն պատրաստակամութիւն յայտնած է ժամանակաւորապէս ետ կանչելու իր ներկայացուցած բանաձեւը: Անոր նախապայմանները հետեւեալներ են.

– Յստակօրէն յայտարարել, որ 1915ի դէպքերը ցեղասպանութիւն են.

– Գերմանիան մեղսակից է այդ իրադարձութիւններուն.

– Գերմանիան պատասխանատուութիւն կը ստանձնէ նպաստելու հայ-թրքական յարաբերութիւններուն մէջ նոր էջ մը բանալու ջանքերուն:

Քննարկումին ընթացքին, կանաչները դժգոհութիւն յայտնած են այն բանէն, որ Գերմանիոյ խորհրդարանը անտեղի կերպով որդեգրած է «Էրտողանը չզայրացնելու քաղաքականութիւն»ը։

Իշխող համախմբումին երեք կուսակցութեանց ներկայացուցիչները նշած են, որ փախստականներու ներկայ պայմաններուն մէջ կարիքը չկայ Թուրքիոյ հետ տարուող բանակցութիւնները վտանգելու: Ըստ իշխող կուսակցութեան ներկայացուցիչներուն՝ այժմ ամենապատեհ ժամանակը չէ՛ նման խնդիր մը քննելու:

Ի պատասխան նման մօտեցումներու, Կանաչներ կուսակցութեան ղեկավար Ճեմ Օզտեմիր յայտարարած է. «Անցեալ տարուան Ապրիլ 24էն ետք Հայոց Ցեղասպանութեան եզրը պարունակող բանաձեւի մը պատրաստութեան սպասած ենք: Ի վերջոյ, այդ իրադարձութիւններուն օրէն արդէն իսկ 100 տարի անցած է: Քիչ մը ինքնայարգանք պէտք է. ամէն անգամ Թուրքիոյ աչքը պէտք չէ համբուրենք: Ժամանակ ուզեցիք եւ մենք սպասեցինք այնքան, որքան ուզած էիք: Հիմա Թուրքիան կը շարունակէ իր սխալ ուղիով ընթանալ։ Հոն կը խօսուի քաղաքակիրթ հասարակութեան մը մասին, բայց կը դատապարտուին ազատ խօսող լրագրողները, որոնցմէ շատերը ի՛մ ընկերներս են: Եթէ իսկապէ՛ս մինչեւ Ապրիլ 24 նման փաստաթուղթ մը կազմուի՝ իմ նշած երեք հիմնակէտերով, ապա կ՛ըսենք՝ «Այո՛, ձեզի հետ ենք»: Բայց մտահոգ եմ, որ երբ ժամանակը գայ, նորէն պիտի ըսէք, թէ «բան մը կը խոչընդոտէ»»:

Քննարկումին ներեկայ էր նաեւ Մերքել, որ բուռն քննարկումներուն ընթացքին շրջած ու խորհրդակցած է պատգամաւորներուն հետ:

Իշխող համախմբումէն պատգամաւորներու խումբ մը խոստացած է մինչեւ Ապրիլ 24 կրկին անգամ քննարկել եւ քուէարկութեան դնել այս գծով բանաձեւին նոր տարբերակը:

Քննարկումը իրեն տրամադրուած 45 վայրկեանէն աւելի՛ երկար տեւած է։

 

LEAVE A REPLY

Please enter your comment!
Please enter your name here