ՀՀ Սփիւռքի Նախարարը Ներկայ Գտնուեցաւ Հայաստանի Լրագրողներու Միութեան «Ոսկէ Գրիչ» Մրցանակի Յանձնման

0
148

Մարտ 1-ին ՀՀ սփիւռքի նախարար Հրանոյշ Յակոբեան Հայաստանի Լրագրողներու միութեան մէջ ներկայ գտնուեցաւ «Քալիֆորնիա Քուրիըր» շաբաթաթերթի  հրատարակիչ եւ խմբագիր Յարութ Սասունեանին Հայաստանի Լրագրողներու միութեան «Ոսկէ գրիչ» մրցանակի յանձնման արարողութեան:

Ինչպէս իր խօսքին մէջ նշեց լրագրողներու միութեան նախագահ Աստղիկ Գէորգեան, Յարութ Սասունեան այդ պարգեւին արժանացած է լրագրողական բարձր արհեստավարժութեան եւ իր խմբագրած «Քալիֆորնիա Քուրիըր» թերթին մէջ հայութեան յուզող  հարցերու շուրջ խմբագրական բազմաբովանդակ յօդուածներու հրապարակման  համար:

Ողջունելով եւ շնորհաւորելով Յարութ Սասունեանը պարգեւին համար` նախարար Հրանոյշ Յակոբեան ընդգծեց. «Արժանի պարգեւը զարդարում է արժանի մարդու կուրծքը: Յարութ Սասունեանը 33 տարի շարունակ իր սուր, անվրէպ խօսքով մշտապէս արթնացնում է ընթերցողական շրջանակների հետաքրքրութիւնը: Մասնաւորապէս, երբ հարցը վերաբերում է Հայոց ցեղասպանութեանը, հայ-թուրքական յարաբերութիւններին, Հայ դատի արծարծմանը նրա գրիչը դառնում է սառը զէնք` լարուածութեան մէջ պահելով թուրք հասարակութեանը…»:  Նախարարը անդրադարձաւ նաեւ  «Լինսի» հիմնադրամին մէջ Սասունեանի աշխատանքին, ինչը կը վկայէր  մեծ հայրենասէր Գըրք  Գըրգորեանի վստահութեան մասին եւ շեշտեց, որ  «Լինսի» հիմնադրամի  շնորհիւ Հայաստանի մէջ զգալիօրէն առաջ մղուեցաւ դպրոցաշինութեան, ճանապարհաշինութեան, մշակութային օճախներու վերանորոգման շատ կարեւոր աշխատանքները:

Յարութ Սասունեան խմբագիրի, հայու եւ ազգային գործիչի մասին խօսեցան գրող-հրապարակախօս Գրիգոր Ջանիկեան, «Ազգ» շաբաթաթերթի գլխաւոր խմբագիր Յակոբ Աւետիքեան, ԵՊՀ Լրագրութեան բաժանմունքի տնօրէն Նաղաշ Մարտիրոսեան, «Արմէնփրէս»  լրատուական գործակալութեան տնօրէն Արամ Անանեան եւ ուրիշներ:

Ձեռնարկին աւարտին շնորհակալական խօսքով  հանդէս եկաւ Յարութ Սասունեան` վստահեցնելով, որ յետայսու եւս ջանք չի խնայեր իր լրագրողական գործունէութեամբ նպաստելու հայութեան յուզող խնդիրներու արծարծմանն ու միջազգայնացմանը:

LEAVE A REPLY

Please enter your comment!
Please enter your name here