ՀԲԸՄ-ՀԵԸ «Վահրամ Փափազեան» Թատերախումբ. «Առանց Տաբատի Անձնասպանը» Թատերախաղի Ներկայացում

0
136

Երէկ` ուրբաթ, 4 մարտ 2016-ի երեկոյեան ժամը 8:30-ին, «Յակոբ Տէր Մելքոնեան» թատերասրահին մէջ ՀԲԸՄ-ՀԵԸ-ի  «Վահրամ Փափազեան» թատերախումբը  հանրութեան առջեւ ներկայացաւ «Առանց տաբատի անձնասպանը» զաւեշտով, հեղինակ եւ բեմադրիչ` Վարդան Մկրտիչեան:

Վարդան Մկրտիչեան, ինչպէս ինք բացայայտեց, այս թատերախաղը գրած է 1990 թուականին` իբրեւ փորձ, երբ ուսանող էր Հայաստանի թատերական հիմնարկին մէջ: Նկատի ունենալով, որ թատերախաղը յատուկ ժամանակաշրջանի մը չի պատկանիր, ան վերամշակելով զայն ուզած է հանրութեան ներկայացնել` անոր մօտ ուրախ տրամադրութիւն մը ստեղծելու նպատակով:

Նիւթը կը խօսի անձի մը մասին, որ կ՛ուզէ անձնասպան ըլլալ, որովհետեւ յուսահատած է կեանքէն ու մարդոցմէ, եւ վիզէն քար մը կախելով կը փորձէ կամուրջէն վար նետել ինքզինք: Սակայն կը տատամսի, որովհետեւ վերջնական որոշում տուած չէ նետուելու: Երկմտանքի վիճակին մէջ, յանկարծ կը յայտնուի այլ անձ մը, որ դարձեալ կ՛ուզէ անձնասպան ըլլալ, որովհետեւ 10 տարիէ պսակուած է եւ զաւակ չունի: Վիճաբանութիւն մը կը սկսի երկուքին միջեւ, թէ ո՛վ առաջ պիտի նետուի կամուրջէն վար, երբ կը յայտնուի գաղտնի ոստիկան մը, որ կը հալածէ գող մը, նաեւ կին մը, որ կորսնցուցած է իր շունը: Դէպքերը արագ կը զարգանան եւ անշուշտ աւարտին ոչ ոք անձնասպան կ՛ըլլայ: Թատերախաղը վերջ կը գտնէ հետեւեալ փիլիսոփայութեամբ. «Կեանքին մէջ բաներ կան, որոնց մասին չգիտնալն ու չհասկնալը աւելի լաւ է, որպէսզի խղճի խայթ չունենայ մարդ` գիտնալուն եւ չգիտնալուն համար»:

Արդարեւ, մօտաւորապէս երկու ժամ տեւողութեամբ Արփի Բարդիեան-Աւետիքեան (կին), Յարութ Թորոսեան (անձնասպան), Յարութ Մանուկեան (մարդ), Յարութ Սիմոնեան (գաղտնի ոստիկան), Եղիկ Աւետիքեան (գող), Շուշան Քէշիշեան (սպասուհի Լիլի) կրցան մարմնաւորել իրենց վստահուած դերերը` սրահին մէջ ստեղծելով հաճելի եւ զուարթ պահեր:

LEAVE A REPLY

Please enter your comment!
Please enter your name here