Երեսփոխանական Այցելութիւն Ամասիոյ Վերջին Հայուն

0
176

ՊՈԼԻՍ, «Մարմարա».- «Ճումհուրիյէ թ» թերթին մէջ կը կարդանք, թէ գլխաւոր ընդդիմադիր Հանրապետական ժողովրդային կուսակցութենէն Պոլսոյ հայազգի երեսփոխան Սելինա Տողան այցելած է Ամասիոյ վերջին հայուն՝ Ռաֆայէլ Ալթունեանին, ու զգացական զրոյց մը ունեցած է անոր հետ։ Տողան գացած է Ալթունեանի բնակարանը, որ կը գտնուի Մեհմետ Փաշա թաղամասը, եւ ունկնդրած է Ալթունեանի կեանքի պատմութիւնը։

Ալթունեան ըսած է, թէ շատ երջանիկ է այն իրողութեան համար, որ հայ երեսփոխան մը այցելած է իր տունը, իսկ Տողան դիտել տուած է, որ իր մեծ հայրը ժամանակին ապրած է Ամասիոյ Կիւմիւշհաճըքէօյ եւ Մերզիֆոն գաւառակներուն մէջ եւ ապա փոխադրուած է Պոլիս։

Կը թուի, թէ Ալթունեան վերջին հայն է, որ մնացած է Ամասիա, ուր ժամանակին մեծ թիւով հայեր ապրած են։ Ալթունեան իր կեանքը դժուար պայմաններու տակ ապրած է՝ կօշիկի նորոգութիւն ընելով եւ ստիպուած ըլլալով թաքցնելու իր հայկական ինքնութիւնը։ Ան պատմած է, թէ ոեւէ ազգական չունի, իսկ ուսումը ստացած է Պոլսոյ այն որբերու դպրոցին մէջ, ուր ուսած է նաեւ Հրանդ Տինք։

Նշենք, որ Տողան Ամասիա գացած էր գաղթականներու մասին պատրաստուած ուսումնասիրութեան մը համար։ Այդ հողերուն վրայ, ուրկէ հայեր ստիպողաբար արտագաղթած են, դեռ կը շարունակէ ապրիլ Ալթունեան։

«Ամասիան ինծի համար հէքիաթ մըն է հիմա, ներկայիս միայն փշրանքներ մնացեր են այն պատմութիւններէն, զորս լսած էի ատենօք։ Շատ կը յուզուիմ, երբ կը տեսնեմ, թէ հոս մնացած մարդիկ իրենց մշակոյթը չեն կրնար ապրիլ, բայց ասիկա Թուրքիոյ մէկ իրականութիւնն է։ Իրականութիւնն այն է, որ ուրիշ բազմաթիւ քաղաքներու մէջ եւս նոյնը կ՛ապրուի։ Վերջին տարիներուն բան մը փոխուեցաւ. ոմանք ուզեցին վերադառնալ իրենց բուն ինքնութեան ու դիմեցին պատրիարքարան, մկրտուեցան։ Ասիկա կարեւոր զարգացում մըն է, եւ հիմա մենք պէտք չէ որ զանոնք առանձին թողունք, անոնց հետ մնայուն կապ պարտինք պահել», այս առթիւ յայտնեց Սելինա Տողան։

LEAVE A REPLY

Please enter your comment!
Please enter your name here