Հայաստանը Պէտք Է Ունենայ Զսպման Եւ Վրիժառութեան Զէնք. Նորատ Տէր Գրիգորեանց

0
245

Խորհրդային Միութեան եւ Հայաստանի Հանրապետութեան պաշտօնաթող գեներալ-լէյտենանտ Նորատ Տէր Գրիգորեանցը, Tert.am-ի հետ զրոյցում անդրադառնալով Ռուսատանի Դաշնութեան (ՌԴ) փոխվարչապետ Դմիտրի Ռոգոզինի յայտարարութեանը, նշեց, որ նա նողկալի քաղաքական գործիչ է, ով հանդէս է գալիս առաջին հերթին ընդդէմ ՌԴ շահերի:

«Չորս միլիարդն աւելի լաւ է, քան բարեկամութիւնն ու հայկական պետականութիւնը, որը ձեր թիկունքն է պահում հարաւում», ասաց հայազգի զինուորականը: Անդրադառնալով առաջին գծում հայ զօրակոչիկների սխրագործութիւններին՝ պաշտօնաթող գեներալը նշեց, որ նրանք, յիրաւի, հերոսական մարդիկ են:

 

«ԹԵՐԹ».- Հայկական երկու պետութիւնների Զինուած ուժերի զարգացման ձեր հայեցակարգով եւ տեսլականով ապրիլեան ողբերգական իրադարձութիւններից յետոյ բանակում բարեփոխումների կարիք տեսնո՞ւմ էք:

ՆՈՐԱՏ ՏԷՐ ԳՐԻԳՈՐԵԱՆՑ.- Ես՝ որպէս այդ Զինուած ուժերի ստեղծողներից մէկը, կարող եմ ասել, որ դրանք կազմակերպուած են, ղեկավարուող, քաղաքականապէս գրագէտ: Այն ժամանակ յագեցած լինելով՝ կարողացան ցեղասպանութիւնից պաշտպանել իմ ժողովրդին ու Արցախը Ադրբեջանի զինուած ուժերից, որը յարձակուել էր ողջ ճակատով: Եւ դա արուեց ֆիդայիների ու նորաստեղծ բանակի կողմից, որը ջարդեց Ադրբեջանի զինուած ուժեր անուանուող ցեղասպան պետութեան այդ համակարգը, եւ ոչ թէ նուաճեց, այլ ազատագրեց Արցախը հարիւր տոկոսով:

20ից աւելի տարիների ընթացքում այդ Զինուած ուժերը պաշտպանել են ու կանգնած են եղել Ադրբեջանի դէմ: Եւ ոչ միայն, որովհետեւ մեր բանակը կանգնած է նաեւ Թուրքիայի Հանրապետութեան Զինուած ուժերի դէմ: Կրկնում եմ, մեր բանակը պաշտպանել է ոչ միայն Արցախը, այլեւ ողջ Հայաստանն ու աշխարհի հայութեանը:

Երկրորդ. հիմա թշնամական զինուած ուժը՝ Ադրբեջանը, որը մշտապէս գոռում է, թէ մենք՝ հայերս, գրաւել ենք Ադրբեջանի 20 տոկոսը, այդ ուղերձը հետեւողականօրէն հասցնում է աշխարհին ու ցոյց տալիս, թէ, իբր, Արցախը գրաւեալ հող է: Հայերը ոչ մի բան չեն գրաւել, հայերը ազատագրել են այդ տարածքները, ի դէպ, ենթարկուելով յարձակման: Կրկնում եմ՝ նրանք յարձակուել են, մերոնք՝ պաշտպանուել, որովհետեւ սա դարեր, հազարամեակներ ի վեր հայկական հող է եղել:

Բայց այս անգամ Ադրբեջանը շատ մեծ թափով յարձակուեց: Եւ եթէ սկզբում այն տպաւորութիւնն էր, որ սա գրոհով հետախուզութիւն է, պարզուեց, որ այն չափազանց ագրեսիւ յարձակում է: Եւ եթէ այնտեղ կանգնած մեր ԶՈՒ ստորաբաժանումները չկարողանային դրա դէմն առնել, հասնելու էին մինչեւ Արցախ ու չգիտեմ՝ ուր: Այնպէս որ, մեր բանակն, ի հարկէ, կատարեց իր խնդիրը, բայց, ըստ իս, հակադարձ հարուածը թոյլ էր: Ես վերջերս հարցազրոյց էի տուել եւ յայտարարել, որ ՀՀ պաշտպանութեան նախարարը եւ ՀՀ ԶՈՒ գլխաւոր շտաբի պետը կարծես խղճացել էին թշնամուն: Եւ պէտք էր նրանց ամբողջութեամբ թողնել հասնել այն կէտին, որտեղ գտնւում է իրական պաշտպանութիւնը, եւ ամբողջութեամբ ջարդել այդ հրոսակներին, որոնց մէջ կային նաեւ «Իսլամական պետութեան» մարտիկներ:

 

«ԹԵՐԹ».- Ամէն դէպքում Ադրբեջանը մեծ կորուստներ չկրե՞ց:

ՆՈՐԱՏ ՏԷՐ ԳՐԻԳՈՐԵԱՆՑ.- Դա կարեւո՞ր է… Պատերազմի ժամանակ միշտ էլ կողմերից մէկը թաքցնում է կորուստները, իսկ միւսն ասում, որ հակառակորդն աւելի շատ կորուստներ է կրել՝ ձգտելով ցոյց տալ, որ ինքն աւելի խելացի է, գրագէտ: Երկու կողմից կան կորուստներ, որովհետեւ սա պատերազմ է: Հրետակոծում են, արկակոծում, հրթիռակոծում: Ես նկատել եմ՝ Հայաստանը միշտ ազնուօրէն ասում է իր կորուստների չափը:

 

«ԹԵՐԹ».-  Ադրբեջանի սպառազինութեան այս մակարդակի պայմաններում բարեփոխումների հարց տեսնո՞ւմ էք՝ կառուցուածքայինից մինչեւ ռազմավարական բնոյթի:

ՆՈՐԱՏ ՏԷՐ ԳՐԻԳՈՐԵԱՆՑ.- Դուք ճիշտ էք, Ադրբեջանի ԶՈՒն յագեցած է սպառազինութիւնների աւելի նոր տեսականիով: Նրանք աւելի շատ փող ունեն, նաւթային դոլարներ ունեն, եւ պէտք էր օգտուելով այս ագրեսիայից՝ ոչնչացնել այս բոլոր նաւթային խողովակաշարերն ու մնացած «շարերը»: Որպէսզի այդ ամէնն այնպէս այրուէր, որ չկարողանային դրանցով սպառազինել իրենց բանակը: Այո, նրանք ունեն շատ տանկեր, համազարկային կրակի համակարգեր ու սպառազինութիւն, որը գնել են ՌԴից: Էրդողանը Ալիեւին հրաման էր տուել առաջին հերթին կրակել ռուսական զէնքով, ինչը եւ արեց Ալիեւը, քանի որ, եթէ նրանք կրակէին թուրքական զէնքով, աշխարհը կ՛ասէր՝ «թուրքերն են տուել հրամանը»: Սա կոպիտ խախտում է ձեռք բերուած պայմանաւորուածութիւնների, եւ նրանք առաջին հերթին վիրաւորանք են հասցրել Ռուսաստանի Դաշնութեանը, որովհետեւ ստացուեց, որ ՌԴն իրենց տուել էր այդ զէնքով հայերին ոչնչացնելու քարտ բլանշ:

 

«ԹԵՐԹ».- Բայց ՌԴն իրեն վիրաւորուած չի համարում, աւելին՝ Ռոգոզինը յայտնեց, որ վաճառել ու շարունակելու են զէնք վաճառել Ադրբեջանին:

ՆՈՐԱՏ ՏԷՐ ԳՐԻԳՈՐԵԱՆՑ.- Ռոգոզինը նողկալի քաղաքական գործիչ է, որը տուեալ դէպքում աշխատել է ընդդէմ Ռուսաստանի: Ի դէպ, ես այդ մասին նամակ եմ գրել ու կարող եմ ասել, որ սա ընկեր Ռոգոզինի կոպտագոյն ու անամօթ վերաբերմունքն է ռուս ժողովրդի ու Ռուսաստանի Դաշնութեան նկատմամբ, որովհետեւ իր այդ խօսքն Ադրբեջանին ասես հրաման լինի՝ «Դէ, կրակիր, ոչնչացրու»: Ինչն էլ պէտք է Ադրբեջանին ու Թուրքիային: Որովհետեւ սա առաջացնում է հայ ժողովրդի դժգոհութիւնը ՌԴի հանդէպ: Եւ նրանց պէտք է, որ Հայաստանը երես թեքի Ռուսաստանից ու գնայ ՆԱՏՕ կամ ինչ-որ այլ տեղ: Իսկ Ռուսաստանը սրանով կը կորցնի հարաւային սահմաններում իր պաշտպանին: Ինչը շատ վտանգաւոր է, որովհետեւ հարաւային սահմաններին ՌԴի միակ դաշնակիցը Հայաստանն է: Իսկ արեւմուտքում միայն Բելառուսն է:

Նրանք հասել են դրան: Այսինքն՝ Ռոգոզինը նրանց օգնեց դա անել: Ահա՜ ձեզ Ռոգոզին: Այնպէս որ, հիմա թող ՀՀն ու ՌԴն եզրայանգման գան, թէ ինչ վիճակ է այդ սահմաններում, երբ շարքից հանեցին այնպիսի քրիստոնէական պետութիւններ, ինչպիսիք են Վրաստանը, Ուկրաինան, հիմա՝ էլ Հայաստանը, յետոյ կ՛անցնեն Բելառուսին: Ամէն ինչ պարզ է, չէ՞: Եւ այդ ժամանակ կը զգան այդ 4 միլիարդի հոտը: Հիմա դեռ Թուրքիայից տասնեակ իսլամիստներ տեղափոխւում են Աֆղանստան, որտեղից կը յարձակուեն Տաջիկստանի, Ուզբեկստանի ու Ռուսաստանի վրայ: Պարզ է, թէ որտեղ է պէտք դաշնակից պետութիւն: Սա Ռոգոզինի խղճի վրայ է:

 

«ԹԵՐԹ».-  Ինչո՞ւ միայն Ռոգոզինի, նա բարձրաձայնել է ՌԴի տեսակէտը:

ՆՈՐԱՏ ՏԷՐ ԳՐԻԳՈՐԵԱՆՑ.- Այո, վարչապետն էլ է ելոյթ ունեցել եւ ասել, որ վաճառում են: Ես էլ ասում եմ՝ «Դէ, շնորհաւորում եմ», 4 միլիարդն աւելի լաւ է, քան բարեկամութիւնը ու հայկական պետականութիւնը, որը ձեր թիկունքն է պահում հարաւում: Հանէք Հայաստանը, եւ Չեչնիան, Դաղստանը, Ինգուշեթիան, Ստաւրոպոլի երկրամասը կապոյտ կրակով են այրուելու: Մենք գիտենք, թէ ինչպէս էր Ադրբեջանն իր տարածքով օգնում արմատական իսլամիստներին:

 

«ԹԵՐԹ».-  Բանակին մօտ կանգնած մի զինուորական վերջերս ասում էր, որ պէտք է 18 տարեկաններին ու կամաւորականներին հանել առաջին գծից, ու նրանց փոխարէն առաջին գծում շարել յատուկ պատրաստուածութիւն ունեցող մարտիկների, որոնք նաեւ բարձր աշխատավարձ կը ստանան: Ինչ-որ ռացիոնալ հատիկ կա՞յ այս մօտեցման մէջ:

ՆՈՐԱՏ ՏԷՐ ԳՐԻԳՈՐԵԱՆՑ.- Կարծում եմ՝ իրաւացի է այդ մարդը: Ճիշդ է՝ ամէն հայ պէտք է պաշտպանի իր հողն ու տունը: Բայց համաձայն եմ, որ աւելի լաւ պատրաստուածութիւն ունեցող եւ աւելի կատարելագործուած մարտիկների կարիք կայ: Եւ եթէ այնտեղ կանգնած է պայմանագրային, աւելի հասուն մարդը 18 տարեկան տղայի փոխարէն, նա աւելի կազմակերպուած է, աւելի ուսուցանուած, աւելի առնական: Սա փաստ է: Նրանք կանգնած են առաջնագծում, եւ դա պաշտպանութիւն չէ, բայց մեր տղաներն այնպէս պաշտպանեցին, որ Ադրբեջանը չկարողացաւ դիմանալ: Այդ տղաները նոյնիսկ իրենք իրենց պայթեցնում էին, այդ տղաները հերոսական մարդիկ են: Երկնային արքայութիւն զոհուածներին: Ըստ որում, սա պաշտպանութիւն չէ, սրանք դիտակէտեր էին, որում կանգնած տղաները այդ ամբողջ տականք հրոսակախմբերին դիմակայեցին: Եւ, այո, այստեղ պէտք է լինեն աւելի հասուն ու պատրաստուած մարդիկ:

Եւ, բացի այդ, այս գիծը կարելի է դարձնել ինչպէս սահմանապահ գիծ՝ կապիտալ կերպով ականապատելով ամէն ինչ: Ամբողջութեամբ ունենալ կառավարուող ականապատ դաշտեր, ռոբոտացուած համակարգեր, այդ թւում՝ զարկի աւտոմատացուած: Բայց սրա համար պէտք է փող ունենալ: Ես չեմ քննադատում, ես ուղղակի ասում եմ՝ մեր բանակը պէտք է լինի յագեցած, սպառազինուած հակամարտութեան բոլոր գործիքներով եւ ղեկավարուի բարձր մակարդակով: Նկատի ունեմ ե՛ւ կօօրդինացումը, ե՛ւ փոխազդեցութիւնը, ե՛ւ հետախուզութիւնը, որովհետեւ մենք ՆԱՏՕական Թուրքիայի ու երկրորդ թուրքական պետութեան՝ Ադրբեջանի զինուած ուժերի շրջափակման մէջ ենք գտնւում, ագրեսիւ ու ցեղասպան շրջափակման, ինչպէս նաեւ՝ դաւաճանական Վրաստանի: Ու քանի որ Հայաստանը ոչ թէ յարձակուող, այլ պաշտպանուող պետութիւն է, պէտք է աւելի շատ պաշտպանողական բնոյթի զէնք ունենայ: Եւ, ինչու չէ, ատոմային զէնք, եթէ ինչ-որ մէկը մեզ այն առաջարկի: Եւ սա զսպման ու վրիժառութեան զէնք է լինելու: Ուզում եմ բացատրել՝ ՌԴն ունի նման զէնք, ոչ ոք նրա վրայ չի յարձակուի: Սա է զսպման ու վրիժառութեան զէնքը:

 

«ԹԵՐԹ».- Այսինքն՝ Հայաստանն ունենայ ատոմային զէնք:

ՆՈՐԱՏ ՏԷՐ ԳՐԻԳՈՐԵԱՆՑ.- Ցանկացած զէնք, որը վրիժառութեան զէնք է: Զինուորականները, որ կը կարդան այս խօսքերը, գիտեն, թէ դա ինչ է, ու դա միայն միջուկային զէնքը չէ: Նման զէնքերի տեսականին կարելի է մէկ ժամ շարունակ թուարկել: Եւ այս զէնքը Հայաստանը պէտք է ստանայ: Կամ էլ գնի՝ իր բոլոր գումարները հաւաքելով: Այլ կերպ լինել չի կարող, քանի որ այս վիճակը յաւէրժական է:

Որպէս վերջաբան՝ պէտք է ասեմ, որ մենք պէտք է ունենանք աշխատատեղեր, որպէսզի այստեղ ներդրումներ արուեն, ու որպէսզի Հայաստանից ոչ ոք չարտագաղթի: Այն ժամանակ ամէն ինչ լաւ կը լինի:

LEAVE A REPLY

Please enter your comment!
Please enter your name here