Թարթուսի, Դամասկոսի, Հոմսի Եւ Հասիչէի Մէջ Ահաբեկչական Պայթիւններու Հետեւանքով 40 Զոհ Եւ Բազմաթիւ Վիրաւորներ

0
110

Թարթուսի ոստիկանութեան աղբիւրները յայտնեցին, թէ այսօր առաւօտեան Թարթուսի արուարձաններու միջազգային մայրուղիին վրայ ահաբեկիչ մը իր վարած ականապատուած ինքնաշարժը պայթեցնելով անձնասպանական ահաբեկչական գործողութիւն մը կատարած է, վայրկեաններ անց, Շտապ օգնութեան ծառայողներու եւ տեղւոյն բնակիչներու փրկարար աշխատանքներուն ընթացքին, նոյն վայրին մէջ, ականապատուած երկրորդ ահաբեկիչ մը ինքզինք պայթեցուցած է: Այս մասին կը գրէ «Գանձասար»-ը:

Ահաբեկչական զոյգ գործողութիւններուն հետեւանքով արձանագրուած է 30 զոհ, 45 վիրաւոր, որոնց կարգին հրկիզուած են բազմաթիւ ինքնաշարժներ:

Նոյն ժամերուն Դամասկոսի ալ Սապուրա-ալ Պիճաա ճամբուն վրայ ահաբեկչական երկու պայթիւններու հետեւանքով արձանագրուած է 1 զոհ, 3 վիրաւոր:

Հոմսի մէջ եւս զինեալ ահաբեկչական խմբաւորումներ, նահանգէն ներս ընթացք առաջ ազգային հաշտութեան աշխատանքները խափանելու հիմնական նպատակով Պապ Թատմոր փողոցին մէջ ահաբեկչական գործողութիւն մը կատարած են, որուն հետեւանքով արձանագրուած է 4 զոհ, 10 վիրաւոր:

Մինչ Հասիչէի «Տուար Մարշօ»-ի մօտ ականապատուած հեծանիւ վարող ահաբեկիչի մը անձնասպանական գործողութեան հետեւանքով արձանագրուած է 5 զոհ, 2 վիրաւոր:

«Գանձասար»-ի Գամիշլիի աշխատակից բժշկհ. Մարի Մելքոն տեղեկացուցած է, որ այսօր առաւօտեան Գամիշլիի «Քորնիշ» թաղամասի բնակիչները ցնցում մը ապրած են ձեռնային ռումբի մը պայթիւնին պատճառով: Պայթիւնին հետեւանքով արձանագրուած են նիւթական փոքր վնասներ:

Ըստ աղբիւրին՝  քաղաքը մահմետական Ատհա տօնին եւ վերամուտին նախօրէին լարուած վիճակ կ՛ապրի:

LEAVE A REPLY

Please enter your comment!
Please enter your name here