Արցախի Տագնապին Կարգաւորումը Կ՛ենթադրէ Որոշ Տարածքներու Վերադարձը Ատրպէյճանին. Ուորլիք

0
124

ԵՐԵՒԱՆ, «Նիուզ».- Ղարաբաղեան հակամարտութեան կարգաւորումը կ՛ենթադրէ որոշ տարածքներու վերադարձը Ատրպէյճանի վերահսկողութեան, Լեռնային Ղարաբաղի կարգավիճակին դիմաց. «Ինթերֆաքս»ին տուած հարցազրոյցին ընթացքին այսպէս յայտարարած է ԵԱՀԿ Մինսկի խմբակի ամերիկացի համանախագահ Ճէյմզ Ուորլիք, պատասխանելով այն հարցումին, թէ ի՞նչ է ղարաբաղեան հակամարտութեան կարգաւորման լաւագոյն ձեւը՝ ըստ Միացեալ Նահանգներուն. Ուորլիք աւելցուց. «Նոյնն է նաեւ ռուսական եւ ֆրանսական կողմերուն համար»։

«Ասիկա կարգաւորման պայմաններէն է, բայց ոչ միակ պայմանը: Կան նաեւ գաղթականներու վերադարձ եւ միջազգային խաղաղարար ուժերու տեղակայում: Այս բոլոր տարրերը խաղաղ կարգաւորման պայմաններ են եւ բոլորին յայտնի են: Մենք պէտք է աշխատինք կողմերուն հետ, որպէսզի այդ բոլոր պայմանները միաւորելու միջոց գտնենք եւ հասնինք խաղաղ կարգաւորման», ըսած է ան՝ աւելցնելով. «Խաղաղ կարգաւորման հասնելու փորձերը շատ երկար կը տեւեն եւ շատ ուժ կը խլեն: Հակամարտութիւնը շատ երկար տեւած է։ 20 տարուան ընթացքին բազմաթիւ մարդիկ զոհուած են: Բայց այդ հակամարտութիւնը կարելի է կարգաւորել: Մենք ունինք կարգաւորման պայմաններ, որոնք յայտնի են բոլորիս, եւ անոնց մասին քննարկումներ կատարած ենք»։

Ուորլիք ընդգծած է, որ տագնապին կատարեալ կարգաւորումը կ՛ենթադրէ յաղթողներու եւ պարտուողներու բացակայութիւն, եւ անիկա պէտք է շահեկան ըլլայ երկու կողմերուն համար։ «Իբրեւ մէկը, որ բազմաթիւ տարիներ բանակցութիւններ վարած է այս հարցերով՝ կրնամ հաստատել, որ բանակցութիւնները չեն կրնար յաջողիլ, երբ կողմերէն մէկը զոհեր տայ եւ ստիպուած ըլլայ զիջումներ կատարելու: Բանակցութիւնները կը յաջողին, երբ երկու կողմերն ալ շահին։ Հայաստանի եւ Ատրպէյճանի բնակիչները, ինչպէս նաեւ ամբողջ տարածաշրջանը, արժանի են խաղաղութեան եւ ապահովութեան մէջ ապրելու», նշած է ան։

Ուորլիք նաեւ ըսած է, թէ Մոսկուայի մէջ կայացած համանախագահներուն եւ Ռուսիոյ արտաքին գործոց նախարար Սերկէյ Լաւրովին միջեւ հանդիպումը՝ «շատ արդիւնաւէտ էր»: «Մօտաւորապէս մէկ ժամ տեւած հանդիպման ընթացքին քննարկեցինք Լեռնային Ղարաբաղի տագնապին խաղաղ կարգաւորումը եւ յետագայ քայլերը: Կը գնահատենք Լաւրովը, որ այսքա՛ն երկար ժամանակ կը տրամադրէ այդ հարցի քննարկման», ըսած է ան եւ վստահեցուցած, թէ Ամերիկա միայն ինքնապաշտպանութեան համար զէնք կը տրամադրէ Հայաստանին ու Ատրպէյճանին, «այդ ալ՝ սահմանափակ քանակութեամբ»:

«Մենք Ատրպէյճանին չենք մատակարարեր յարձակողական զէնք, որ կրնայ օգտագործուիլ Լեռնային Ղարաբաղի հակամարտութեան գօտիին մէջ», շեշտած է ան:

LEAVE A REPLY

Please enter your comment!
Please enter your name here