«Ինքնավար Հանրապետութեան Կարգավիճակը՝ Ալիեւի «Առաւելագոյն Զիջումը»

0
99

«Ինքնավար հանրապետութեան կարգավիճակն է Ղարաբաղի հարցով առաւելագոյն փոխզիջումը, որուն պատրաստ է Ատրպէյճան», յայտարարած է երկրի ղեկավար Իլհամ Ալիեւ, ռուսական «Նովոսթի» լրատուական գործակալութեան տուած իր ծաւալուն հարցազրոյցին ընթացքին, որուն մէջ նաեւ անդրադարձած է Արեւմուտքի, Ռուսիոյ, Թուրքիոյ եւ Իրանի հետ իր երկրի յարաբերութիւններուն, ինչպէս նաեւ իր անձնական յարաբերութիւններուն՝ Փութինի հետ, եւ ի հարկէ, խօսած է Արցախի հարցին մասին:

«Ատրպէյճանի տարածքային ամբողջականութիւնը չի քննարկուիր եւ չի կրնար քննարկման առարկայ դառնալ. մենք չենք համաձայնիր Ղարաբաղին անկախ կարգավիճակ տրամադրելուն, եւ հայկական կողմը այդ մէկը շատ լաւ գիտէ: Սակայն խելացի փոխզիջում մը կարելի է՝ Լեռնային Ղարաբաղի բնակչութեան ապահովութեան, կենսունակութեան եւ ինքնավարութեան երաշխաւորումը, ինչպէս նաեւ ատրպէյճանական ներդրումային ծրագիրներու իրականացումը Ղարաբաղի մէջ: Նաեւ՝ ազգերու խաղաղ գոյատեւումը այս տարածքին մէջ, այն պայմանով, որ Հայաստան ազատ ձգէ Ղարաբաղի շուրջ շրջանները», ըսած է Ալիեւ եւ պնդած, որ այս պայմանները համահունչ են այն առաջարկներուն, որոնց շուրջ Պաքու կ՛աշխատի միջնորդներուն հետ:

Ան պնդած է, թէ Ատրպէյճանի նման, Հայաստան եւս խաղաղութիւն կ՛ուզէ, սակայն՝ «չ՛ուզեր վերադարձնել ուրիշին տարածքները», եւ աւելցուցած է, թէ հայկական կողմի ո՛չ կառուցողական դիրքորոշման պատճառով, բանակցութիւնները տեղքայլի մէջ են:

Անդրադառնալով Միացեալ Նահանգներու արտաքին գործոց նախարար Ճան Քերիի յայտնի յայտարարութեան, թէ Արցախի տագնապի կարգաւորման ժամանակը դեռ չէ հասած, եւ թէ ղարաբաղեան խնդիրը աւելի բարդ է, քան նոյնիսկ Պաղեստին-իսրայէլեան տագնապը՝ Ալիեւ ըսած է, թէ Քերիի այս յայտարարութիւնը ամբողջովին կը հակասէ նախագահ Պարաք Օպամայի դիրքորոշման, որովհետեւ, ըստ Ալիեւի՝ Օպամա Ֆրանսայի եւ Ռուսիոյ նախագահներուն հետ համատեղ քանի մը յայտարարութիւններ կատարած է՝ շեշտելով, որ Արցախի ներկայ իրավիճակը անընդունելի՛ է: Ալիեւ այն կարծիքը յայտնած է, թէ այս յայտարարութեամբ՝ Քերի հակամարտութեան շուրջ բանակցութիւնները երկարաձգելու ազդանշան կու տայ Հայաստանին:

Ալիեւ նաեւ բողոքած է Արեւմուտքին դէմ՝ պնդելով, թէ Արեւմուտքը կը փորձէ խառնուիլ Ատրպէյճանի ներքին գործերուն՝ աջակցելով ընդդիմադիր կուսակցութիւններուն: Ան միաժամանակ պնդած է, թէ բարեկամական լաւ յարաբերութիւններ ունի Ռուսիոյ նախագահին հետ՝ զայն «ազնիւ մարդ» եւ «մեծ երկրի մեծ առաջնորդ» կոչելով:

Ալիեւ ապա խօսած է Ռուսիա-Իրան-Ատրպէյճան եռանկիւնին մասին՝ նկատելով, որ այս ռազմավարական միութիւնը արդէն իսկ իրականութիւն է եւ տարածաշրջանային լուրջ գործօն:

Մեկնաբանելով ղարաբաղեան հիմնախնդիրի կարգաւորման վերաբերեալ Իլհամ Ալիեւի վերոյիշեալ յայտարարութիւնները՝ Հայաստանի արտաքին գործոց նախարարութեան մամլոյ քարտուղար Տիգրան Բալայեան ըսաւ. «Ադրբեջանի ղեկավարի յայտարարութիւնները կարելի է դիտարկել որպէս իրականութիւնը ոտքից գլուխ շուռ տալու եւ բանակցային գործընթացը խեղաթիւրելու հերթական անյաջող փորձ: Հէնց Ալիեւի կողմից մէջբերուող ԵԱՀԿ Մինսկի խմբի համանախագահ երկրների ղեկավարների յայտարարութիւններում յստակ ամրագրուած է, որ Լեռնային Ղարաբաղի կարգավիճակը որոշուելու է Լեռնային Ղարաբաղի ժողովրդի պարտադիր իրաւական ուժ ունեցող կամարտայայտութեան միջոցով: Աւելի լաւ կը լինէր, որ Ադրբեջանի ղեկավարութիւնը ինքնախաբէութեամբ չզբաղուէր: Մէկ շաբաթ առաջ, Ադրբեջանի ղեկավարը արդէն հրապարակաւ խոստովանել էր բանակցութիւնների իրական բովանդակութեան մասին՝ նշելով, որ Բաքուին յորդորում են ճանաչել Լեռնային Ղարաբաղի անկախութիւնը»:

LEAVE A REPLY

Please enter your comment!
Please enter your name here