Էրտողան Կը Հրաւիրուի Ցեղասպանութեան Նուիրուած «Աղէտ» Համերգին

0
160

Թուրքիոյ նախագահ Ռեչեփ Թայիփ Էրտողան հրաւիրուած է մասնակցելու համերգի մը, որ Նոյեմբեր 13ին պիտի կայանայ Պոլսոյ մէջ Գերմանիոյ հիւպատոսարանի համալիրէն ներս։ Համերգը նուիրուած է Հայոց Ցեղասպանութեան 100ամեակին եւ կը կոչուի «Աղէտ»։ Համերգէն ետք տեղի պիտի ունենայ Գերման-Հայ-Թրքական բարեկամութեան միութեան բացման արարողութիւնը։

Նախագահ Էրտողանին ուղղեալ հրաւէրին մէջ կը շեշտուի, որ այսպիսի միջոցառումներ երեք երկիրներու արուեստագէտներուն միջեւ համագործակցութիւն հաստատելու նպատակներ կը հետապնդեն։ Դիտել կը տրուի նաեւ, որ այս երկու նախաձեռնութիւնները կը կազմակերպուին Գերմանիոյ արտաքին գործոց նախարարութեան ու Եւրոմիութեան աջակցութեամբ։

Էրտողանէն խնդրուած է մինչեւ Նոյեմբեր 5, պատասխան նամակով մը տեղեկացնել հրաւէրի ընդունման կամ մերժումին մասին։

Յիշեցնենք, որ մօտաւորապէս ամիս մը առաջ, Թուրքիա կասեցուցած էր իր մասնակցութիւնը «Ստեղծագործ Եւրոպա» նախագիծին, որ 200 միլիոն եուրոյի աջակցութիւն ցուցաբերած էր Գերմանիոյ Տրեզտըն քաղաքի սիմֆոնիք նուագախումբին կողմէ պատրաստուած եւ Հայոց Ցեղասպանութեան նուիրուած «Աղէտ» համերգային նախագիծին։

«Ստեղծագործ Եւրոպա»ն 1.460 միլիառ եուրոյի ամավարկով նախագիծ մըն է, որ կ՛աջակցի Եւրոպայի մէջ 2014-2020ի միջեւ կայացող մշակութային ձեռնարկներու։ Ծրագիրին միացած երկիրները, որոնց կարգին էր նաեւ Թուրքիա, տարեկան որոշ գումար մը կը յատկացնեն ընդհանուր ամավարկին, եւ այդ գումարները կը ծախսուին անդամ երկիրներու մշակութային նախագիծերուն աջակցելու համար։

LEAVE A REPLY

Please enter your comment!
Please enter your name here