Զինադադարի Պահպանումը Կ՛ապահովէ Բանակցութեան Անհրաժեշտ Հիմքը. Համանախագահներ

0
96

Հայաստանի Հանրային ձայնասփիւռի կայանը կը հաղորդէ, թէ ԵԱՀԿ Մինսկի խմբակի համանախագահներ Իկոր Փոփով (Ռուսիա), Փիեռ Անտրէ (Ֆրանսա), Ճէյմզ Ուորլիք (Միացեալ Նահանգներ) եւ ԵԱՀԿի գործող նախագահի անձնական ներկայացուցիչ դեսպան Անճէյ Քասփրչիք Հոկտեմբեր 26ին միացեալ յայտարարութիւն մը տարածած են՝ Հոկտեմբեր 23էն 25 տարածաշրջան կատարած իրենց այցի արդիւնքներուն վերաբերեալ:

Ատրպէյճան, Հայաստան եւ Արցախ կատարուած այցելութեանց նպատակն էր ապրիլեան աննախադէպ բռնութիւններէն ետք ստեղծուած իրավիճակի քննարկումը եւ բանակցային գործընթացին մէջ դիրքերու յստակացումը:

Յայտարարութեան մէջ ըսուած է.

«Հանդիպումներուն ընթացքին կողմերը հաստատած են, որ իրավիճակը կը շարունակէ յարաբերականօրէն հանգիստ մնալ: Համանախագահները ընդգծած են, որ հրադադարի պահպանումը կ՛ապահովէ ընթացող բանակցութիւններու անհրաժեշտ հիմքը եւ նշած Վիեննայի եւ Ս. Փեթերսպուրկի մէջ ընդունուած որոշումներուն լիակատար իրականացման կարեւորութիւնը: Համանախագահները նաեւ քննարկած են աշխատանքային առաջարկները՝ հասնելու առարկայական բանակցութիւններու, յանուն տեւական խաղաղութեան: Նախագահներէն իւրաքանչիւրը արտայայտած է իր տեսակէտները, թէ ինչպէ՛ս առաջ տանիլ կարգաւորման գործընթացը, եւ վերահաստատած են համաձայնութիւնը ԵԱՀԿի գործող նախագահի անձնական ներկայացուցիչի գրասենեակի ընդլայնման ուղղութեամբ, որուն գործնական  մանրամասնութիւնները տակաւին կը քն-նարկուին:

Համանախագահները կը ծրագրեն հանդիպիլ արտաքին գործոց նախարարներուն հետ 2016ի Դեկտեմբերին, Համպուրկի մէջ կայանալիք ԵԱՀԿի նախարարական խորհուրդի հանդիպման ընթացքին, քննարկելու համար ամենականուխ առիթով նախագահներու հանդիպումը իրականացնելու կարելիութիւնը: Ամենաբարձր մակարդակով նման երկխօսութիւն անհրաժեշտ է՝ կարգաւորման հարցին մէջ յառաջխաղացք արձանագրելու նպատակով:

Տարածաշրջանային այցին ժամանակ համանախագահները նաեւ հանդիպած են Կարմիր Խաչի միջազգային կոմիտէին հետ, քննարկելու համար այն աշխատանքը, զոր կազմակերպութիւնը կ՛իրականացնէ՝ անհետացած անձերու մասին տեղեկատուութեանց փոխանակման ուղղութեամբ. աշխատանք մը, որուն իրենց լիակատար աջակցութիւնը յայտնած են համանախագահները»:

 

LEAVE A REPLY

Please enter your comment!
Please enter your name here