Ցեղասպանութեան Նուիրուած Պոլսոյ Համերգը Կը Ջնջուի

0
98

Գերմանիոյ արտաքին գործոց նախարարութիւնը յատուկ հաղորդագրութիւն մը հրապարակելով տեղեկացուց, թէ Նոյեմբեր 13ին նախատեսուած եւ Պոլսոյ մէջ Գերմանիոյ հիւպատոսարանի համալիրէն ներս կայանալիք Տրեզտըն քաղաքի սինֆոնիք նուագախումբի «Աղէտ» կոչուած համերգը չեղեալ համարուած է։

Նշեալ ստեղծագործութիւնը նուիրուած է Հայոց Ցեղասպանութեան 100ամեակին, իսկ համերգէն ետք տեղի պիտի ունենար Գերման-Հայ-Թրքական բարեկամութեան միութեան բացման արարողութիւնը։

Գերմանիոյ արտաքին գործոց նախարարութիւնը տեղեկացուց, որ Նոյեմբեր 13ին հիւպատոսարանի շէնքը ազատ պիտի չըլլայ, ու այդ պատճառաբանութեամբ է, որ համերգը կը ջնջուի։

Ինչպէս գրած էինք, համերգին համար հրաւէր ուղղուած էր նախագահ Էրտողանին եւ այլ բարձրաստիճան պաշտօնատարներու։ Գերմանական լրատու գործակալութիւնները կը յայտնեն, թէ համերգը ա՛յս իսկ հրաւէրներուն ստեղծած աղմուկին պատճառով ջնջուած է։ Կ՛ըսուի, թէ հրաւէրները ուղարկուած են առանց Գերմանիոյ արտաքին գործոց նախարարութիւնը տեղեակ պահելու։

Յայտնենք, որ նուագախումբը կը ծրագրէ «Աղէտ»ը Նոյեմբերին ներկայացնել Պելկրատի ու Երեւանի մէջ։

«Աղէտ»ը գոյացած է Զէյնետ Կետիզօղլուի(Թուրքիա), Վաչէ Շարաֆեանի (Հայաստան) ու Հելմութ Օրհինկի (Գերմանիա) ստեղծագործութիւններուն հիման վրայ։

 

LEAVE A REPLY

Please enter your comment!
Please enter your name here