Փութին. «Ռուսիա Սուրիոյ Մէջ Ինքնազսպում Կը Կատարէ, Սակայն Մեր Համբերութիւնը Չափ Ու Սահման Ունի»

0
152

Ռուսիոյ նախագահ Վլատիմիր Փութին յայտնեց, որ իր երկիրը կրնայ կորսնցնել համբերութիւնը եւ այս կամ այն ձեւով հակադարձել վարմունքներուն, զոր չնշեց:

Փութին միջազգային «Վալտայ» համախմբումի ընդհանուր նիստին ընթացքին իր արտասանած խօսքին մէջ յայտնած է, որ նոյնիսկ Սուրիոյ մէջ կռիւը դադրեցնելու վերաբերեալ Միացեալ Նահանգներու նախագահ Պարաք Օպամայի հետ իր անձնական համաձայնութիւնը չգործադրուեցաւ` աւելցնելով. «Ուաշինկթընի մէջ գոյութիւն ունին ուժեր, որոնք ամէն ինչ կատարեցին Սուրիոյ մէջ կռիւներու դադրեցումը չգործադրելու համար, սակայն մեր համբերութիւնը սահման ունի»:

Միացեալ Նահանգներու արտաքին գործոց փոխնախարար Էնթընի Պլինքին յայտնեց, որ «սուրիական տագնապին մէջ երկու մարտահրաւէրներ կան` մէկը ահաբեկչական ՏԱՀԵՇ խմբաւորումը, իսկ միւսը` երկրին մէջ ընթացող քաղաքացիական պատերազմը»` աւելցնելով. «Սուրիոյ եւ Իրաքի մէջ հաւասարապէս մեծ յառաջդիմութիւն արձանագրեցինք եւ վերատիրացանք Սուրիոյ մէջ խմբաւորումին վերահսկողութեան տակ գտնուող տարածքներուն 25 առ հարիւրին, եւ անոր վրայ յաւելեալ ճնշում կը տեսնենք: Այժմ հիւսիսային Սուրիոյ մէջ գոյութիւն ունի շրջան մը, որ ապահովական գօտի մըն է, որուն կ՛աջակցին Թուրքիան եւ տեղական ուժերը, եւ ատիկա ինքնին առիթներ կը ստեղծէ»:

«Ռուսիան պէտք է որոշէ, թէ այդ հարցին մէջ ի՛նչ ներդրում պիտի ունենայ», ըսաւ ան:

Պլինքին նշեց. «Յառաջիկայ օրերուն Ռաքքա քաղաքին վրայ յաւելեալ ճնշում տեղի պիտի ունենայ, եւ ատիկա հրատապ է, որովհետեւ արտասահմանի մէջ ահաբեկչական յարձակումներէն շատերը այդտեղ կը ծրագրուին ու կը պատրաստուին»:

«(Սուրիոյ մէջ) քաղաքացիական պատերազմը, նախքան կացութեան բարելաւուիլը, պիտի վատթարանայ, եւ ատիկա ժխտական անդրադարձներ պիտի ունենայ բոլորին վրայ, ներառեալ Ռուսիոյ վրայ», ըսաւ Միացեալ Նահանգներու արտաքին գործոց փոխնախարարը:

Միւս կողմէ, Ժէյշ Ֆաթըհ յայտարարեց Հալէպը գրաւելու եւ անոր շրջափակումը ջնջելու համար «Հալէպի մեծ ճակատամարտ»-ին շղթայազերծումը եւ այդ ծիրին մէջ հրթիռակոծեց ու ռմբակոծեց Հալէպի թաղամասերը, ինչպէս նաեւ «Կրատ» տիպի 20 ռումբեր արձակեց Հալէպի միջազգային օդակայանին վրայ:

Նշենք, որ սուրիական բանակին ու զինեալ խմբաւորումներուն միջեւ բուռն բախումներ տեղի կ՛ունենան Հալէպի 1070 եւ Ռաշիտէյն ճակատներուն վրայ:

LEAVE A REPLY

Please enter your comment!
Please enter your name here