Ատրպէյճան Ընդդիմացած Է Սահմանային Միջադէպերու Հետաքննութեան Համակարգի Առաջարկին. Զախարովա

0
140

ԵՐԵՒԱՆ, «Երկիր».- Ռուսիոյ արտաքին գործոց նախարարութեան պաշտօնական ներկայացուցիչ Մարիա Զախարովա հաստատած է, որ Լեռնային Ղարաբաղի հակամարտութեան գօտիին մէջ հետաքննութիւն հաստատելու առաջարկին ընդդիմացած է Ատրպէյճանը:

Զախարովա նշած է, որ այդ գաղափարին հեղինակը ռուսական կողմն էր: «2011ին իսկ, Սոչիի մէջ կայացած եռակողմանի հանդիպման ընթացքին, ռուսական կողմը հանդէս եկած էր Լեռնային Ղարաբաղի հակամարտութեան գօտիին մէջ զինուած միջադէպերու հետաքննութեան նախաձեռնութեամբ: Ապա, ԵԱՀԿ Մինսկի խմբակի համանախագահները, ԵԱՀԿի գործող նախագահի անձնական ներկայացուցիչին հետ պատրաստեցին համապատասխան համակարգի մը նախագիծը: Այնուհետեւ, անիկա մշակուեցաւ նաեւ ԵԱՀԿի փորձագէտներուն կողմէ», ըսած է Զախարովա։

Ըստ անոր՝ Վիեննայի գերաստիճանին ժամանակ համաձայնութիւն ձեռք բերուած է կարճ ժամանակի մէջ այդ աշխատանքը աւարտելու շուրջ, սակայն Յունիսին, Հայաստանի, Ատրպէյճանի եւ Ռուսիոյ նախագահներու Ս. Փեթերսպուկի հանդիպման ընթացքին, այդ հարցին շուրջ համաձայնութիւն չէ գոյացած՝ Պաքուի ընդդիմութեան պատճառով։

«Ատրպէյճանական կողմը պնդեց, որ զինուած միջադէպերու հետաքննութեան որեւէ անհրաժեշտութիւն չկայ, քանի որ այդ պահուն հակամարտութեան գօտիին մէջ իրավիճակը կայուն էր: Այդ պատճառով ալ, այս հարցը չէ արտացոլացուած այդ հանդիպման արդիւնքներուն վերաբերեալ յայտարարութեան մէջ: Միաժամանակ, մեր կարծիքով, համակարգին հարցը կը մնայ օրակարգի վրայ», ընդգծած է Զախարովա:

LEAVE A REPLY

Please enter your comment!
Please enter your name here