Չենք Կրնար Պնդել «Առանց Ասատի» Լուծումին Վրայ. Թուրքիոյ Փոխվարչապետ

0
132

ԱՆԳԱՐԱ, «Ռոյթըրզ».-  Սուրիոյ հարցով  Ասթանայի  մէջ  կայանալիք  միջազգային բանակցութեանց սեմին, Թուրքիոյ փոխվարչապետ եւ կառավարութեան բանբեր Նուման Քուրթուլմուշ յայտարարեց. «Սուրիոյ նախագահ Պաշշար Ասատի հեռացումը ներկայիս անիրատես պայման մըն է: Այլեւս անկարող ենք «առանց Ասատի» լուծման վրայ պնդելու»:

Մինչ այդ, Սուրիոյ հարցով ՄԱԿի յատուկ պատուիրակ Սթեֆան տը Միսթուրա յոյս յայտնեց, որ Սուրիոյ վերաբերեալ Ասթանայի բանակցութիւնները կը յանգեցնեն երկրին մէջ զինադադարի դրութիւնը ամրապնդելու ջանքերուն միաւորման ու ամրապնդման: «Կը նախատեսուի, որ Ասթանայի ժողովը ամրապնդէ այն, որուն մասին խօսած են Ռուսիոյ նախագահ Վլատիմիր Փութինն ու Թուրքիոյ նախագահ Ռեչեփ Թայիփ Էրտողանը, ինչ որ նաեւ սուրիացի ժողովուրդին ուզածն է», ըսաւ ան:

Պատասխանելով Ասթանայի բանակցութիւններուն արդիւնքը՝ վաւերացման նպատակով ՄԱԿի Ապահովութեան խորհուրդին ներկայացնելու անհրաժեշտութեան մասին հարցումի մը, տը Միսթուրա ըսաւ. «Ատիկա կախեալ է Ապահովութեան խորհուրդի անդամ երկիրներէն»:

Միւս կողմէ, պաշտօնական աղբիւրներ «Շարք Աուսաթ» օրաթերթին յայտնած են, թէ ֆրանսացի բարձրաստիճան դիւանագէտ մը ներկայ պիտի գտնուի Ասթանայի բանակցութիւններուն եւ խորհրդատուութիւն պիտի կատարէ սուրիական ընդդիմութեան:

LEAVE A REPLY

Please enter your comment!
Please enter your name here