Սփիւռքի Նախարարութեան Մէջ Տեղի Ունեցաւ Հայոց Բանակի 25-Ամեակին Նուիրուած Ձեռնարկ

0
125

27 յունուարին Հայաստանի Հանրապետութեան սփիւռքի նախարարութեան աշխատակիցները` նախարար Հրանուշ Յակոբեանի գլխաւորութեամբ, այցելեցին Եռաբլուր զինուորական պանթէոն եւ ծաղիկներ զետեղեցին արցախեան պատերազմին զոհուած  ազատամարտիկներու շիրիմներուն:

Այնուհետեւ սփիւռքի նախարարութեան մէջ տեղի ունեցաւ հայոց բանակի օրուան նուիրուած հանդիսաւոր ձեռնարկ` հայրենադարձ ազատամարտիկներու, սփիւռքահայ ներկայ զինուորական ծառայողներու, պետական պաշտօնեաներու, համահայկական կառոյցներու երեւանեան գրասենեակներու, ինչպես նաեւ սուրիահայերու աջակցութեան հարցերով զբաղող հասարակական կազմակերպութիւններու ներկայացուցիչներու մասնակցութեամբ:

Ողջոյնի խօսքով հանդէս եկաւ Հայաստանի Հանրապետութեան սփիւռքի նախարար Հրանուշ Յակոբեան: Ան նշեց. «Այսօր տօն է Հայաստանի, Արցախի եւ սփիւռքի մէջ: Սիրով եւ ջերմութեամբ կը շնորհաւորեմ բոլորիս այս պայծառ ու յաղթական տօնի` հայոց բանակի 25-ամեակին առիթով: Փառք ու պատիւ բոլոր անոնց, որոնք ինկան, որ մենք ապրինք ու կերտենք մեր երկու անկախ պետութիւնները` Հայաստանն ու Արցախը: Հայաստանը այսօր հպարտ է իր սփիւռքով: Սփիւռքը Արցախեան պատերազմի օրերուն մեր կողքին էր: Երբ Հայաստանը  անկախացաւ, սփիւռքէն շատ հայորդիներ եկան եւ կռուեցան Արցախի մէջ»:

Այնուհետեւ նախարար Հրանուշ Յակոբեան ձեռնարկին մասնակից հայրենադարձ ազատամարտիկները պարգեւատրեց սփիւռքի նախարարութեան Երախտագիտութեան մետալով:

Շնորհակալութիւն յայտնելով պարգեւին համար` ազատամարտիկ Անդրանիկ Պօղոսեան նշեց, որ ան իր պարտքը կատարած է հայրենիքին հանդէպ: Ան համոզմունք յայտնեց, որ նոր սերունդը  ապրիլեան քառօրեայ պատերազմին ապացուցեց, որ պատրաստ չէ ոեւէ մէկուն զիջիլ ազատագրուած հայկական հողերը:

Նախարարը ներկաներուն ներկայացուց սուրիահայ Գազանճեան ընտանիքը: «Դաւիթ եւ Նաթալիա Գազանճեանները 5 զաւակ ունին: Անոնցմէ 3-ը` Գէորգը, Թորոսը եւ Մեսրոպը այսօր կը ծառայեն հայոց բանակին մէջ: Իսկ Գէորգը մասնակցած է ապրիլեան պատերազմին»,  նշեց սփիւռքի նախարարը: Նախարար Յակոբեան Գազանճեաններուն յանձնեց Հայաստանի սփիւռքի նախարարութեան շնորհակալագիր:

Սփիւռքի նախարարը նշեց, որ ապրիլեան քառօրեայ պատերազմը անգամ մը եւս փաստեց հայ ժողովուրդին միասնականութիւնն ու համախմբուածութիւնը: Այդ օրերուն մարդկային եւ այլ կորուստներ տեսած Արցախին օգնելու նպատակով Հայաստանի եւ սփիւռքի մէջ  բազմաթիւ նախաձեռնութիւններ իրականացան,  որոնց մէկ մասը դարձան յիշարժան պատմութիւններ:

Ցուցադրուեցան աշխարհի տարբեր հայկական համայնքներէն յղուած, հայոց բանակին նուիրուած շնորհաւորանքի ուղերձներ:

Հնչեցին ազգագրական, ժողովրդական երգերու կատարումներ:

LEAVE A REPLY

Please enter your comment!
Please enter your name here