Պաքու Հաշուի Կ՛առնէ Հայաստանի Մէջ Ռուսական Ռազմական Խարիսխը

0
132

ԵՐԵՒԱՆ, «Երկիր».- Ատրպէյճանի արտաքին գործոց նախարար Էլմար Մամետեարով «ՌԻԱ Նովոսթի»ին տուած հարցազրոյցին ընթացքին յայտարարած է, որ Հայաստանի մէջ ռուսական ռազմական խարիսխի առկայութիւնը՝ «Մոսկուայի եւ Երեւանի գործն է, բայց Պաքու հաշուի կ՛առնէ այդ մէկը»:

Մամետեարով յիշեցուցած է, որ ռուսական խարիսխը Հայաստանի մէջ եղած է խորհրդային օրերէն: «Այդ ռազմական խարիսխը երկար ժամանակէ ի վեր հոն է, եւ զօրքերու բաւական ուժեղ խմբաւորում մը կը գտնուի հոն, որովհետեւ անիկա ՆԱԹՕի անդամ Թուրքիոյ հետ սահմանին վրայ է: Մենք պէտք է մեր աչքերը բաց պահենք՝ հաշուի առնելով նման խարիսխի մը մարտահրաւէրները եւ սպառնալիքները», ընդգծած է նախարարը:

Մամետեարով նաեւ յայտարարած է, որ Արցախի հարցով ներկայ իրավիճակը չի բաւարարեր որեւէ մէկը՝ «բացի, հաւանաբար, հայկական կողմէն»։

«Իբրեւ նախարար, իմ պաշտօնավարման ժամանակ քանի մը անգամ բաւական մօտ եղած եմ այդ հարցին մէջ յառաջխաղացքի հաւանականութեան», ըսած է Մամետեարով: Ըստ անոր՝ անհրաժեշտ է աստիճանաբար «մաքրել սեղանը խնդիրներէ»:

Ան աւելցուցած է, որ Պաքու պատրաստ է մասնակցելու Մոսկուայի մէջ ծրագրուող՝ Լեռնային Ղարաբաղի հակամարտութեան կարգաւորման նպատակով Ռուսիոյ, Հայաստանի եւ Ատրպէյճանի արտաքին գործոց նախարարներու հանդիպման, սակայն նշած է, թէ տակաւին յստակ թուականի մը շուրջ համաձայնութիւն չկայ:

LEAVE A REPLY

Please enter your comment!
Please enter your name here