Քաթար Մերժած Է Իրեն Ներկայացուած Պահանջները

0
154

«Ռոյթըրզ» լրատու գործակալութիւնը կը հաղորդէ, որ Քաթար պատրաստ է արաբական պետութիւններու հետ քննարկելու գոյութիւն ունեցող խնդիրները` վերջ դնելու համար շրջանային ճգնաժամին, սակայն յայտարարած է, որ անոնց կողմէ անցեալ շաբաթ ներկայացուած պահանջներու ցանկը կը բովանդակէ այնպիսի կէտեր, որոնք անկարելի է գործադրել, որովհետեւ չեն համապատասխաներ իրականութեան:

Քաթարի արտաքին գործոց նախարար շէյխ Մոհամետ պըն Ապտել Ռահման Ալ Թանի երէկ յայտարարած է. «Մենք չենք կրնար խզել Իսլամ եղբայրներու, Քայիտայի եւ լիբանանեան Հըզպալլայի հետ կապերը, որովհետեւ այդպիսի կապեր գոյութիւն չունին: Եւ մենք չենք կրնար հեռացնել Իրանի Յեղափոխական պահակագունդի անդամները, որովհետեւ անոնք Քաթարի մէջ գոյութիւն չունին»:

Ան յայտարարած է նաեւ, թէ որովհետեւ Տոհայի համար անկարելի է դադրեցնել բաներ, որոնք երբեք չէ կատարած, «մեզի կը մնայ եզրակացնել, որ վերջնագիրին նպատակը նշեալ խնդիրները լուծելը չէր, այլ իր գերիշխանութիւնը զիջելու համար Քաթարի վրայ ճնշում գործադրելը: Ատիկա մենք չենք ըներ»:

Սէուտական Արաբիոյ, Եգիպտոսի, Արաբական Միացեալ Էմիրութիւններու եւ Պահրէյնի ներկայացուցած պահանջներու գործադրման ժամկէտը կը վերջանայ կիրակի օր:

Նշենք, որ Թուրքիոյ պաշտպանութեան նախարարութիւնը երէկ հաղորդեց, որ Քաթարի պաշտպանութեան նախարար Խալետ Աթիէ այսօր պիտի այցելէ Անգարա:

LEAVE A REPLY

Please enter your comment!
Please enter your name here